Iaz baino turista gehiagok bisitatu dute Lekeitio aurtengo udan

2016/10/13

Lekeitioko turismo bulegoak jasotako datuen arabera, iaz baino bisitari gehiago egon da aurtengo udan, Lekeition. Ekainetik irailera bitartean, bulegoan, 20.725 kontsulta eduki dituztela jakitera eman du udalak; iaz 19.338 izan ziren. Leku ezberdinetatik heldu dira bisitariak Lekeitio ezagutzera. Bizkaitarren atzetik, madrildarrak eta Herrialde Katalanetakoak izan dira gehienbat. Atzerritarrei dagokienez, berriz, frantsesak eta Erresuma Batukoak bisitatu dute Lekeitio batez ere, eta horien atzetik, alemaniarren eta holandarren kopurua gehitu dela azaldu dute.

Lekeitio, jendez beteta, ekaineko egun batean.

Bisitariek, batez ere, Lekeitiori eta Bizkaiari buruzko informazioa eskatzen dutela ere zehaztu dute. Bai eta Euskal Kostaldekoa ere.”Planoak, mapak eta eskuorriak eskatzen dituzte; leku interesgarriei eta museoei buruzko informazioa. Non jan, non lo egin eta zer jarduera eskaintza dagoen jakin nahi izaten dute eta euskal kultura eta herriko usadioei buruz ere galdetzen dute, gure bizimodua ezagutzeko interesa adieraziz”.

Herriko interesguneei dagokienez, berriz, denetara, 1.990 pertsonak bisitatu dute aurten, Santa Katalina itsasargia. Iaz baino bisita gutxiago izan dira. Izan ere, iaz, 2.016 pertsona joan ziren ezagutzera.

Basilikara bisitak. Joan den urtean hasitako proiektuagaz jarraituz, Santa Maria Basilikara bisitak egin ahal izan dira uztailean, abuztuan eta irailean. Bisita libre, gidatuak eta audiogidak eskaini dituzte, eta emaitzak “oso baikorrak” direla azpimarratu dute. “2.514 pertsonak bisitatu dute eliza. Pasa den urtean 1.275 izan ziren”.

Iaz, bisitek eduki zuten erantzun ona ikusita, uda honetan hilabete bat gehitu diote eskaintzari. Beraz, uztailean ere bisitatu egin ahal izan da Lekeitioko basilika. Hala ere, epealdi bereko bisita kopuruak gorantz egin du. Iazko epe berdina kontuan hartuta, abuztuan eta irailean 1.631 pertsonak ikusi dute eliza.