Zaldi probak, Etxebarrian, azaroaren lehen asteburuan
Zaldi probak jokatuko dira Etxebarrian azaroaren 5etik 8ra bitartean. Zaldi nagusiak azaroaren 5ean eta 6an aterako dira probalekura, kinttopekoak, berriz, azaroaren 7an eta 8an. Zaldi probetan parte hartu nahi dutenek urriaren 21a izango dute izena emateko aukera. Etxebarriko udaletxean eman behar da izena, 20:00etan.
Saioak 21:00etan izango direla jakitera eman du probak antolatzen dituen Etxebarriko Udalak. Parte hartu nahi dutenek izena eman eta gero, eurak izendatuko dituzte egun bakoitzeko partaideak.
Beti bezala, Etxebarriko 800 kiloko harria erabiliko da probetan, 50 kiloko txapa gehituta, eta animaliek 30 minutu edukiko dituzte proba osatzeko.
Federazioaren kontrolpean. Abereek, gehienez, 400 kilo eduki beharko dituzte. Hortik gorakoek gainkarga izango dute: kilo bakoitzeko, kilo bat.
Betiko modura, zaldi probak Euskal Herriko Kirol Federazioak kontrolatuta egongo direla jakitera eman du Etxebarriko Udalak, eta zaldiak saio bakoitza hasi baino ordubete aurretik pisatuko dituzte. “Zaldi bakoitzak bi itzain libre eramango ditu”, zehaztu dute.
Sariei dagokienez, guztira 6 sari banatuko dira: lehenengo postua bere egiten duenak 800 euro eta Olaia jatetxeak eta Otsolo tabernak emandako mantak eta udalak emandako txapelak eskuratuko ditu. Bigarren postutik seigarrenera arte, 700, 600, 550, 450 eta 400 euro banatuko dituzte, hurrenez hurren.
Zaldi probak Etxebarriko probalekuan.
