Berriatuko Udalak HITZA proiektua diruz laguntzeko hitzarmena sinatu du
Hitzarmena berrituta, Berriatuak beste lau urtez (2016, 2017, 2018 eta 2019) HITZA proiektua diruz lagunduko du. Udalak jakitera eman duenez, HITZA proiektua euskararen biziberritze eta berreskuratzeko funtsezkoa da. “Horrez gain, proiektua bultzatuz, herritarren euskarazko informazio bideak eraiki eta indartzen dira”.
Euskalgintzan lan egiten duten beste eragile askok bezala, HITZA-k ere euskararen normalizazioan “ekarpen esanguratsua” egiten duela gaineratu dute. “Eskualdean sortzen den informazioa euskaratik eta euskaraz kudeatu eta komunikatzen du”. Eta proiektuak hartzen duen eremua kontuan hartuta, HITZA-k egiten duen ekarpenaren onuradunak Lea-Artibai, Mutriku eta Busturialdeko herritarrak dira.
Horregaz batera, HITZA-k bai paperean eta baita sarean ere egiten duen lana aitortu egin behar dela azaldu dute. “Udalaren eta proiektuaren arteko lankidetza hitzarmena beharrezkoa da proiektuaren kalitatea ziurtatu eta sendotzeko”.
Aurreko urteetan egin modura, datozen urteetan ere, elkarlana oinarri hartuta, Berriatuko Udalak eta HITZA-k euskararen erabileraren normalizazio lanak bideratzen jarraituko dute.
Halaber, teknologia berriak tarteko hedabideen bilakaera azkarra dela eta, aurrera egiteko bideak etengabe aztertu eta egin beharreko hobekuntzak egiteko saiakerak egiteko konpromisoa hartu dute bi aldeek.
Harpidetzak gehitzen. Baina hor ez dira amaitzen Berriatuko Udalak hartutako konpromisoak. Izan ere, datozen urteetan ere HITZA marka jendarteratu eta harpidedunen sarea zabaltzeko “etengabeko ahalegina” egingo duela esan dute udal ordezkariek. Eta bide horretatik, berriatuarrei animatzeko eta HITZAren harpidedun egiteko eskaera egin die udalak.
Gainera, proiektua laguntzeko bide ezberdinak daudela ere agertu dute. “Zuzenean diru ekarpena egiteaz gain, publizitatea ipiniz edota proiektuak kaleratzen dituen bestelako euskarrietan parte hartuz ere lagundu ahal da”.
Larraitz Ibaibarriaga, Jon Arriola eta Ama Lur Bedialauneta, hitzarmena sinatzen
