Lea Ibarreko Umeen Eguna ospatuko dute domekan, Aulestin

Aintzina Monasterio

Amoroto,Aulesti,Gizaburuaga,Mendexa,Munitibar

2016/10/27

Amorotoko, Aulestiko, Gizaburuagako, Mendexako eta Munitibarko umeek primeran pasatzeko egun osoko plana izango dute aukeran, beste behin. 11:30etan hasi eta 14:30ak arte askotariko jolasetan ariko dira. Tirolina, arku tiroa edota kutxen jolasa probatuko dituzte, eta horrekin batera, lorezaintza tailerrean parte hartzeko tartea hartuko dute.

Lea Ibarreko Umeen Eguna Amoroton egin zen 2013an

Bazkalostean ere ez dute aspertzeko astirik edukiko. Izan ere, 16:30etatik aurrera ginkanan ariko dira, eta 18:00etan, berriz, karaokea hasiko dute. Horma irudi erraldoia. Bestalde, goizean zein arratsaldean dragoi puzgarria egongo da txikienentzat. Halaber, adin guztietako umeek aurpegia margotzeko txokoan haien sormena lantzeko lekua izango dute goizez zein arratsaldez. Era berean, mural erraldoia margotuko dute eskualdeko artista txikiek. Ohiturari eutsiz, eguna behar bezala borobiltzeko txokolatadan elkartuko dira Lea Ibarreko umeak. EGITARAUA:

11:30-14:30: Tirolina, arku tiroa, kutxen jolasa eta lorezaintza tailerra.
11:30-14:30: Dragoi puzgarria, mural erraldoia eta aurpegia margotzeko txokoa.
16:30: Ginkana.
18:00: Karaokea.
16:30-19:00: Dragoi puzgarria, mural erraldoia eta aurpegia margotzeko txokoa.