Sardina barra-barra deskargatu dute Ondarroan
Baxurako ontziak sardina asko ari deskargatzen Ondarroako portuan. Kalare deuna kofradiak igorritako datuen arabera, urriaren 20tik 26ra bitartean, 303.700 kilo saldu dira bentan. Oro har, tamaina handiko aleak izan dira, eta nahikoa prezio onean saldu da arraina. Kiloa, bataz beste, 1,15 euroan saldu da.
Datuak kontuan hartuta, kopururik gehiena asteon lehorreratu dute. Martitzenean [urriak 25] 100.000 kilo deskargatu zituzten, eta eguaztenean [urriak 26], ostera, 122.000 kilo. Prezioari dagokionez, kiloa euroaren bueltan saldu da. Gaur [urriak 27], aldiz, zer edo zer garestiago saldu da sardina kiloa. Goizean saldu diren lehen sortak 1,30 euro inguruan ordaindu dira.
Sardinaz gain, txitxarro baltz asko ere ari dira porturatzen egunotan. Astebetean, esaterako, 119.600 kilo baino gehiago porturatu dituzte. Prezio aldetik, ostera, merke saldu da arraina, 40 zentimo inguruan kiloa. Gaur [urriak 27], berriz, nahikoa tamaina handiko aleak ikusi dira portuan, eta alerik handienak nabarmen garestiago saldu dira goizeko lehen bentan, euroaren bueltan.
Harrapaketa kopuruak egunotan handiak izan direla kontuan hartuta, gainera, ontzi asko ikusi dira egunotan deskargatzen Egidazu Kaian. 30 bat ontzi porturatu dira egunotan, Galiziakoak, Asturiaskoak eta Kantabriakoak, gehienak.
Asteko salmenta:
Arrantzaleak sardina deskargatzen Ondarroan
- MARTITZENA [urriak 25]
- Txitxarro baltza. 58.000 kilo; 32 zentimo, bataz beste.
- Sardina. 100.000 kilo; 1,11 euro, bataz beste.
- Betandia. 10.300 kilo; 1,22 euro, bataz beste.
- Lantzoi. 10.200 kilo; 57 zentimo, bataz beste.
- Boba. 4.000 kilo; 37 zentimo, bataz beste.
- EGUAZTENA [urriak 26]
- Txitxarro baltza. 40.000 kilo; 60 zentimo, bataz beste.
- Sardina. 122.000 kilo; 99 zentimo, bataz beste.
- Estorninoa. 28.000 kilo; 79 zentimo, bataz beste.
- Betandia. 5.000 kilo; 84 zentimo, bataz beste.
- Txitxarro zuria. 4.300 kilo; 1,96 euro, bataz beste.
