Emakume puntisten kalitatea agerian, Nazioarteko Topaketetan

2016/10/31

Adin guztietako ia hogeita hamar emakume puntistek bere kalitatea erakutsi dute asteburuan Getxoko Fadura eta Bilboko Deportivo Klubeko frontoietan ospatu den Emakumeen Nazioarteko lehen Topaketan. Xisterak, Bizkaiko Foru Aldundiaren, Bizkaiko eta Euskadiko Federazioen eta Getxo Kirolak-en babesagaz antulatutako ekitaldiak Euskal Herriko herri eta hiri ezberdinateko puntistak bildu ditu. Berriatua, Markina-Xemein, Mutriku, Biarritz, Donibane Garazi, Gasteiz eta Donostiako puntistak Bartzelonako eta Montornes del Vallesgo (Herrialde Katalanak) pilotariekin zein Parmiers, Paue eta Parisko (Frantzia) pilotariekin jokatu dute.

Nazioarteko Topaketetan parte hartu duten emakumeak eta antolatzaileak. Argazkia: Xistera

Zesta-puntan jokatzen hasi berri diren nesken erakustaldiagaz hasi zituzten topaketak. Jarraian, txikien mailako puntistak alde batetik, eta nagusi mailakoak, bestetik, bina kiniela jokatu zituzten hamar tantora. Sei bikoteetatik puntu gehien lortu zituzten bi bikoteak hamar tantoko beste partida bat jokatu zuten ondoren, zein baino zein gehiago zen erakusteko.

Aintzindaria. Estreinako bider egin den topaketa hau “oso aberasgarria” izan dela nabarmendu zuten parte hartzaileek. “Gure herrian horrelako ekitaldi bat izatea gustatuko litzaiguke, zesta puntari bultzada emateko”, adierazi zuen Bartzelonako klubeko Mariona Cañisek. Era berean, emakume guztiak animatu zituen zesta-punta probatzera.

Gazteen mailako Gasteiz Jai Alaiko Itxaso Moralesek, berriz, bere amak zestaz jokatu nahi izan zuela gogoratu zuen. “Baina ez zuen aukerarik izan, eta orain nik, berriz, badaukat jokatzeko aukera”. Xisterako Eskolen Sustapen Arloko arduraduna den Izaro Arbe markina-xemeindarrak ere, topaketen garrantzia nabarmendu zuen. “Hau lehen pauso bat da proiektuaren barruan. Gure asmoa zesta-puntan gero eta neska gehiago izatea delako”.