Arnaitz Burgoa ondarrutarra, 7. Floridako Ironman proban
Arnaitz Burgoa Egiguren triatleta ondarrutarrak emaitza paregabea lortu du Floridako (AEB) Panama City Beach-en jokatu den Ironman proban. Sailkapen orokorrean 7. amaitu du Koaxi S Concept taldekoak.
Sailkapen orokorrean emaitza bikaina lortzeaz gain, triatleta ondarrutarrak 4. postua lortu du bere kategorian, 40-44 urte bitarteko adin kategorian, hain zuzen. Probaren ostean, oso pozik agertu da Burgoa. “Espero baino emaitza hobea lortu dut”.
Proba burutzeko 9 ordu, 10 minutu eta 8 segundo behar izan ditu ondarrutarrak –Jack McAfee irabazleak baino 21 minutu eta 53 segundo gehiago–. Ordubete, hiru minutu eta bederatzi segundotan bete zituen igeriketako 3 kilometro eta 800 metroak, 4 ordu, 44 minutu eta 29 segundo behar izan zituen bizikletako 180 kilometroak amaitzeko eta maratoiko tartea 3 ordu eta 15 minututan bete zuen.
Burgoak nabarmendu duenez, lasterketa oso gogorra izan zen. Mexikoko golkoko uretan egindako igeriketako zatia, oro har, gogorra izan zela adierazi du Koaxikoak. “Uretan mugimendu oso handia egon zen. Bi bueltan egin behar izan genituen igerian, 1.900 metrokoa bakoitza, eta olatu handia zegoenez, buiak ezin ikusita ibili nintzen”.
Igeriko proba ez eze, bizikletakoa eta korrikakoa ere gogorrak izan zirela gaineratu du Burgoak. “Bizikletako ibilbidea oso laua baldin bazen ere, haizeak denetik jotzen zuen, eta horrek asko nekatu ninduen. Nekea, batez ere, korrikako azken partean igartzen hasi nintzen. Azken 8 kilometroak amaigabeak izan ziren”.
Arnaitz Burgoa, eskuman, bere kategoriako lehen hiru sailkatuekin batera (Tim Hola, Markku Toiviainen eta Vicente Bobadilla)
Arnaitz Burgoa saria eskuetan
