Gure Esku Dago-k gutxieneko sinadura kopuruak lortu ditu Lea-Artibain eta Mutrikun

Asier Alkorta

Amoroto,Aulesti,Berriatua,Etxebarria,Gizaburuaga,Ispaster,Lekeitio,Markina-Xemein,Mendexa,Munitibar,Mutriku,Ondarroa,Ziortza-Bolibar

2017/01/10

Maiatzaren 7an egingo dute herri galdeketa Lea-Artibain eta Mutrikun. Eta Gure Esku Dago galdeketa egiteko gutxieneko sinadurak batzen ibili da herriz herri. Zapatura [urtarrilak 7] arteko datuen arabera, Amoroton eta Munitibarren izan ezik (oraindik ez dute sinadura bilketa hasi), gainerako herriek gutxieneko sinadurak lortu dituztela jakitera eman dute herri dinamikek. Guztira, 4.432 herritarrek eman diote babesa galdeketari (2.922 behar ziren). Hona hemen zerrenda eta orain arte lortutako sinadura kopurua:

Aulesti: 216 –lortu dituztenak– (gutxienez lortu behar zituztenak: 84)
Amoroto: — (51)
Berriatua: 213 (103)
Etxebarria: 250 (101)
Gizaburuaga: 35 (26)
Lekeitio: 1.034 (613)
Markina-Xemein: 603 (418)
Mendexa: 113 (59)
Munitibar: — (61)
Mutriku: 740 (600)
Ondarru: 1.143 (749)
Ziortza-Bolibar: 85 (57)

Sinadura gehiago. Sinadura bilketak hasita dauden herrietan, otsailera arte sinadura gehiago batzen jarraituko dute. “Otsailaren erdialdera arte, sinadurak batzeko aukera gehiago eskainiko ditugu herrietan. Helburua da ahalik eta sinadura gehien lortzea, eta ondorioz, herritar guztiei sinatzeko esan nahi diegu”.