Kalamuatik Barinagara jaitsiera, urtarrilaren 21ean

2017/01/10

Barinagako Jai Batzordeak antolatuta, 5 kilometro inguruko jaitsiera egingo da urtarrilaren 21ean Kalamuako tontorretik Barinagako frontoiraino aringa-aringa. 10:30ean igoko dira parte-hartzaile guztiak batera Kalamuaraino, eta 12:00etatik aurrera, minututik minutura korrikalari batek irtengo du Barinagarantz. Lehenengo neska zein mutilentzako hiru sari egongo dira:

100 euro, Plaza anaiek emandako txapela eta bertso afarirako gonbidapen bi.
75 euro eta Santamañeko gazta eder bat.
50 euro eta Meabe okindegiko kopeta ikusgarri bat.

Horretaz gainera, parte-hartzaile guztientzat jan-edana egongo da lasterketa amaieran, eta opariak ere zotz egingo dituzte. “Parte-hartzaile guztiei kamiseta bat oparituko zaie lasterketaren oroigarri modura, eta dutxatzeko aukera ere egongo da”, azaldu dute antolatzaileek. Jaitsieran parte hartzeko www.herrikrosa.eus web orrialdean eman behar da izena, 5 euro ordainduta. Urtarrilaren 20 izango da azken eguna.