222 eskaera jaso dira aurtengo Lekeitioko Kale Antzerki jaialdian parte hartzeko
28. Lekeitioko Kaleka Naziorteko Kale Antzerki Jaialdian parte hartzeko 222 eskaera jaso dituzte. Programazio ofizialean parte hartzeko eskaerak egiteko epea urtarrilaren 31n amaitu zen, eta erantzuna “ikaragarria” izan dela esan dute kale antzerki jaialdiaren antolatzaileek. “Jasotako eskaera guztien artean konpainiak, bakarkako artistak eta askotariko sormen lanak egiten dituzten taldeak daude”.
Proposamenak herrialde ezberdinetatik jaso dituztela argitu dute: Espainia, Portugal, Frantzia, Kolonbia, Italia, Argentina… Dena dela, Euskal Herriko talde edota artistak ere aipatu behar direla gaineratu dute; 65 eskaera jaso dira.
Proposamen horiek guztiak eskuetan hartuta, otsaila eta martxoa bitartean aukeraketa prozesua egingo dutela azaldu dute. Eta bitartean, aurtengo jaialdian lehen aldiz egingo den sail berri baten parte hartzeko aukera zabaldu dute. Kaleka Scratch izena dauka sail horrek, eta sormen garaikideko sektorean lan egiten duten artistei publikoaren aurrean garatzen ari diren proiektuak probatzeko aukera ematea du helburu. “Garatzen dauden lanak bultzatzeko eta publiko potentzialagaz harremanetan jartzeko beste modu bat eskaintzen duen plataforma izango da”.
Ikuskizun horietan, publikoak sormen prozesuan dauden lan horien parte hartuko du. Sail horretan izena emateko epea zabalik dago martxoaren 1era arte (egin klik hemen).
