Lea-Artibai eta Hernaniko Bertso-Eskolen arteko desafioa, Markina-Xemeinen
Bertsotruk egitasmoaren baitan, Hernani eta Lea-Artibaiko bertso eskolen arteko bertso saioa egongo da bihar [otsailak 10], 20:00etan, Buztarri tabernan. Helduen bertso eskolen arteko harremanak sustatu asmoz antolatu zen Bertsotruk, eta Lea-Artibaiko taldeak parte hartuko duen bigarren aldia izango da aurtengoa.
Eneko Arrate eta Nahia Ibarzabal markina-xemeindarrek, Lander Ibarluzea Aitxulua etxebarritarrak eta Iñaki Lersundi ondarrutarrak egingo dute kantuan Lea-Artibairen izenean. Hernanitik datoz berriz, Iker Osa, Oier Iurramendi, Andoni Mujika eta Arnaitz Lasarte.
Hirunaka. Bertso eskola parte hartzaileak hiruko multzotan bereizi eta bertso eskola bakoitzak bere multzoko beste biak hartzen ditu etxean; era berean, beste bi bertso eskolek antolatutako ekitaldira joaten dira. Horrela, Lea-Artibaiko bertsolariak Hernanin egon ziren lehenengo, 2016ko abenduaren 23an, eta bigarren saioa izango dute Markina-Xemeingoa. «Bertsolari ezberdinak parte hartzen dute, eta plazarik ez dutenei edo plaza gutxi dutenei aukera ematen saiatzen gara», azaldu dute Markina-Xemeingo Bertso-Eskolakoek. Xabat Galletebeitia eta Aissa Intxausti lekeitiarrak eta Alexander Idoeta ondarrutarrak hartu zuten parte Hernaniko Sariketan.
Hernaniko Bertso-Eskolagaz gain, Sakanako Bertso-Eskola ere egokitu zaie taldean, eta eurekin ere egingo dute bertsotan.
Emanaldia doakoa izango da, eta bertsozaleak saiora gonbidatu dituzte Markina-Xemeingo Bertso-Eskolakoek.
Saioa eta gero, afaria edukiko dute parte hartzaile guztiek.
Buztarri tabernan egin zen Markina-Xemein eta Lesakako bertso eskolen arteko desafioa. Argazkia: Markina-Xemeingo Bertso-Eskola
