Partida erabakigarria jokatuko dute Urrutikoetxeak, Imazek, Altuna III.ak eta Barriolak Markina-Xemeingo frontoian
Binakako txapelketaren hamaikagarren jardunaldia lehia handiagaz ailegatuko da zapatuan [otsailak 11], Markina-Xemeingo Uni frontoira. Urrutikoetxea eta Imaz sailkapeneko zuloan daude hiru garaipenegaz, eta Altuna III.ak eta Barriolak garaipen bat gehiago besterik ez dute. Matematiken arabera, bi bikoteek daukate oraindik finalerdietarako sailkatzeko aukera, baina horretako garaipenen sokari eutsi eta gorantzako bideari ekin beharko diote. Markina-Xemeingo puntua erabakigarria izango da bikote bientzat.
Atzo [otsailak 8] arratsaldean ere Markina-Xemeinen egon ziren lau pilotariak zapatuko partidurako materiala aukeratzeko. Asegarceko bikoteak 106,6, 106,2 eta 105,8 gramoko hiru pilota aukeratu zituen, Altunak eta Barriolak, bestalde, 105,8, 106,5 eta 105,6 gramoko beste hiru. Pilotekin «pozik» geratu ziren, baina garaipenaren premia azpimarratu zuten.
Barriolak autokritika ere egin du, bigarren itzulian bere errendimenduak beherantz egin duela esanez. «Sendotasuna galdu dut, eta argi dago horregatik iritsi dela gure krisia», adierazi du Leitzako atzelariak. Hala ere, egoerari buelta emateko gogoz dago. «Gure izaera berreskuratu behar dugu, eta nik lehiakorragoa izan behar dut».
Aretxabaletaren itzulera. Jokoan sartzeko gogoz dago, bestalde, Andoni Aretxabaleta pilotari markina-xemeindarra. Bursitiseko lesioak jota ia lau hilabete geldirik egon ondoren, kantxetara itzuliko da zapatuan, bere herrian, Markina-Xemeinen. Arretxe II-Beroiz eta Victor -Aretxabaleta izango da Binakako txapelketaren aurreko partida. 17:45ean hasiko da.
Inongo minik barik eta guztiz sendatuta dagoela jakitera eman du Markina-Xemeingo pilotariak. Ebakuntza ondorengo lehen asteetan hobekuntza handia nabaritu zuela azaldu du. «Egunetik egunera hobetzen joan nintzen, bizkor eta ondo. Hala ere, azken hilabete eta erdian hobera egite hori geldiagotzen joan zen».
Denbora aurrera zihoala eta, Itxaso Sanchez fisioterapeutaren eta Enric Sirvent espezialistagaz tratamendu berezi bat probatu zuen Aretxabaletak, eta bi egunetan «izugarrizko hobekuntza» nabaritu zuela adierazi du. Horrela, baimena eman ziotenean entrenamenduekin hasi zen.
Lehenengo bakarrik ibili zen entrenatzen, eta azken aste bietan beste pilotariekin batera. «Azken bi asteetan topera ibili naiz, hala ere, oraindik asko kostatuko zait jokoa hartzea. Dena dela, lana ondo egin dut, eta etorriko dira gero, emaitzak».
Kantxetarako itzulera bere herrian izatea ere «pozik» hartu du Aretxabaletak. «Zorte ederra da herrian jokatu ahal izatea». Bestalde, Markina-Xemeingo frontoia, azken urteetan, Binakako Txapelketaren plaza finko bat bihurtu izana ere nabarmendu du, eta horrek maila handiko ikuskizunak herrian egotea ahalbidetu duela dio.
Norgehiagoka gogorra. Biharko partida borrokatua izango da Aretxabaletaren ustez. Indartsu ikusten ditu Urrutikoetxea eta Imaz. «Egia da ere, Altunak gorakada egin duela». Barriolari dagokionez, betidanik miretsi duen pilotaria dela azpimarratu du, eta bere ibilbide profesionala amaitu orduko Markina-Xemeinen ikusi ahal izatea «handia» dela beretzat. «Bere aurka jokatzeko zortea eduki dut. Abel Barriolak pilotari handi bat eta gizon handi bat dela erakutsi du beti».
Zapatuko pilota jaialdia ikusteko sarrerak salgai egongo dira bihar [otsailak 10] eta etzi [otsailak 11] Uni pilotalekuko leihatilan. Bihar, 18:00etatik 20:00etara eskuratu ahalko dira, eta etzi 16:30ean hasiko dute sarreren salmenta.
Barriola, Altuna III.a, Urrutikoetxea eta Imaz, Markina-Xemeingo aukeraketan. Argazkia: Asegarce
Andoni Aretxabaleta Asegarceko pilotaria.
