Astelehenean lan istripua eduki zuen gazte mutrikuarra hil egin da
LAB sindikatuak jakinarazi duenez, astelehenean [otsailak 6] Azkoitiko Ibarmia enpresan lan istripua eduki zuen gazte mutrikuarra hil egin da. 35 urteko langilea “oso larri” zegoen astelehenaz geroztik, eta gaur [otsailak 10] hil da. Lau metroko altueratik erori zen behargina, eta Betelu enpresako langilea zen izatez. LABek istripua “isilean eta ezkutuan gorde izana” salatu zuen atzo: “Ibarmia Adegiko presidenteordearen enpresa da, eta Adegiko ordezkari nagusiak dira isiltasunaren konplize nagusiak. Zergatik isilean gorde? Zerbait ari dira ezkutatzen edo manipulatzen?”. HITZA harremanetan jarri zen Ibarmia enpresarekin, baina ez zutela hitz egingo jakinarazi zuten enpresakoek.
Gazte mutrikuarraren heriotza salatzeko, bestalde, mobilizazioak deitu dira. Gehiengo sindikalak (ELA, LAB, ESK, STEILAS, EHNE eta HIRUk) deituta, martitzenean [otsailak 14] elkarretaratzea egingo da Donostiako Adegiren egoitza aurrean, 12:00etan, Lan istripu gehiagorik ez. Prekarietatea hiltzailea! lelopean. LABeko ordezkaritzak jakitera eman duenez, Mutrikutik elkarretaratzera joateko aukera egongo da. “Irteera 10:45ean izango da, goiko biribilgunetik”.
LABek gertatutakoa argitzeko beharrezkoak diren ikerketa egiteko eta neurriak hartzeko eskatu die erakundeei, ikuskaritzari, Osalani eta Lan Delegaritzari, “behar bezalako prebentzio politika ezarri eta kontrola dezaten”. Sindikatuak adierazi du “beharrezkoa” dela eredu aldaketa, “langileon osasuna eta bizi eta lan baldintzak lehentasunezkoak izango dituen eredu ekonomikora eta sozialera bidean”.
LAB sindikatuak elkartasuna adierazi dio hildakoaren lagunei eta senideei. Gipuzkoako Sortuk ere salatu du gertatutakoa.
Horrez gain, mutrikuarra azpikontratatuta egoteari ere garrantzia eman dio LABek. “Azpikontratazioa prekarietatearen “oinarrizko osagaia” da, eskubide eta prebentzio neurrien faltarekin, erritmo azkarrarekin, presioarekin, koordinazio eta kontrol neurrien faltarekin batera”. Sindikatuko kideek adierazi dute azpikontratazioak “gutxi batzuen irabaziei” egiten diela mesede. “Nazka-nazka eginda” daudela ere salatu dute. “Nazkatuta gaude eredu honek ekartzen dizkigun ondorioez, egoera honen erantzuleen mezu eta hitz lotsagarriekin, langileen osasunaren eta bizitzaren aurretik mozkin eta irabaziak lehenestearekin”.
Erlazionatutako edukiaMutrikuar bat larri zauritu da Azkoitian izandako lan istripuan
