Gaztetxeari buruzko ekarpenak jaso nahi ditu Mutrikuko Gazte Asanbladak
Mutrikuko Gazte Asanbladak antolatuta, asanblada irekia egingo da bihar [otsailak 18], 17:30ean, Gaztetxean. Saioan, oro har, herritarrek Gaztetxeari buruz dituzten proposamenak, zalantzak, kritikak eta ideiak jaso nahi dituzte. “Herriko gazte zein helduentzat ateak zabalik ditugu. Etorri, eta eman zure iritzia”.
Gazte asanbladako kideek nabarmendu dutenez, orain arte aste barruan egin ohi dituzte Gaztetxeari buruzko asanbladak, baina jende gehiago batzeko asmoarekin, asteburuan jarri dute hitzordua. “Aurrera begira ere, hilean behin batzeko asmoa dugu. Izan ere, Gaztetxea zelan erabili denon artean erabaki beharrekoa da”.
Umeekin batera. Etzi [otsailak 19], berriz, guraso eta haur asanbladak antolaturiko ekintza egingo da, 17:00etatik aurrera. Ekintza, hain zuzen ere, umeei zuzendurikoa izango da, eta adierazi dutenez, tenperarekin jolasean ariko dira. “Eskuak zikindu, eta egunari kolore pixka bat jarriko diogu”.
Guraso eta haur asanbladako kideek gogorarazi dutenez, ezinbestekoa da haur bakoitza guraso edo norbaitekin batera agertzea.
