Nepaleko lurrikararen kaltetuei laguntzeko egindako lanak ikusgai egongo dira Etxebarriko Antsotegi hotelean
2015eko apirilean Nepalen gertatutako lurrikararen ondorioz egoera larrian geratu ziren familiei laguntzeko elkartasun erakusketa bat antolatu zuten Antsotegi hotelean. Orain berriz, borondatea eman zuten guztiei esker egindako konponketak jarriko dituzte ikusgai, beste argazki erakusketa baten bidez.
Antsotegi hotelekoek, mendizale talde bategaz batera antolatutako elkartasun ekimenak 14.000 euro bildu zituen, 3.000 euro Antsotegin bertan, eta diru laguntza horregaz guztiagaz egindakoa erakutsi nahi diete orain, laguntasuna eman zuten guztiei.
Alde batetik, Martin Zabaletari Everestera igotzen lagundu zion sherparen familiaren etxea konpondu dute, eta bestetik, herri oso bateko teilatuak eraiki eta tenplu bat ere berreraiki dute. Prozesu hori guztia argazkietan jaso zuten, eta orain ikusgai egongo da, hilabete osoan, Antsotegi hoteleko hormetan.
«Herria berriztuta, nepaldarrak teilatuak eraikitzeko xaflak eramaten eta laguntza eskertzeko opariak ematen ikus daiteke argazkietan besteak beste», azaldu du Antsotegi hoteleko Julen Hernandok.
Harreman estua. Antsotegi hoteleko familiak harreman estua dauka Nepalegaz. Izan ere, Emilio Hernandok Martin Zabaleta buru zuen Everestera egin zen lehenengo euskal espedizioan hartu zuen parte. Hori dela eta, lurrikara gertatu zenean berehala agertu ziren laguntzeko prest.
«Oso pozik geratu gara emaitzagaz. Gainera, bertara laguntza ematera joan zirenei ere harrera oso ona egin zieten nepaldarrek, eta hori guztia partekatu nahi izan dugu borondatea eman zuten guztiekin», nabarmendu du Gontzal Hernandok.
Nepalen egindako lanak. Argazkia: Antsotegi
