25. Bizkaiko Bertsolari Gazteen BBK Sariketan parte hartuko dute Lea-Artibaikoek

Izaro Mendieta

2017/03/07

25 urte beteko dituen Bizkaiko Bertsolari Gazteen BBK Sariketa hartuko du bihar [martxoak 8] Arratzuk. Guztira, zortzi taldek parte hartuko dute txapelketan, eta horien artean izango dira aurten ere, Lea-Artibaiko gazteak. 10:45ean hasita, lehenengo kanporaketa lehiatuko dute bihar Busturialdeko eta Durangaldeko bertsolariek, Barrutialde BHIn. Hala, talde bien artean puntu gehien lortzen dituenak lehenengo finalaurrekoa jokatu beharko du martxoaren 24an, Zallan.

XXV. Bizkaiko Bertsolari Gazteen BBK Sariketa

Gaur goizean egin dute aurtengo txapelketaren aurkezpena, Bilboko BBK Salan. Argazkia: BBK.

Lea-Artibaikoek, berriz, hilaren 21ean izango dute bertsotan aritzeko hitzordua, Uribe Butroekoekin batera. Egun horretan, Markina-Xemeingo kultur aretoan jokatuko dute laugarren kanporaketa. Guztira, 48 bertsolari lehiatuko dute txapelketa, eta adinaren arabera banatuta parte hartuko dute: 18 urtera artekoak izango dira batetik, eta 18 urtetik 24 urtera artekoak, aldiz, bestetik. Hala ere, txapelketak taldekako izaera duela kontuan hartuta, taldekideen lana talde moduan baloratuko dute; alegia, saio bakoitzean puntu gehien lortzen dituen taldea pasatuko da hurrengo probara. Saio guztiak irekiak direla gogorarazi du Bertsozale elkarteak, eta, bereziki, finalera bertaratzeko gonbidapena egin die herritarrei. Finala martxoaren 31an lehiatuko dute Bilboko BBK Salan. EGUTEGIA: Martxoak 8 (1. kanporaketa). 10:45ean, Barrutialde BHIn, Arratzun. Parte hartzaileak: Busturialdea eta Durangaldea.

Martxoak 14 (2. kanporaketa). 11:30ean, Arratia BHIn, Igorren. Parte hartzaileak: Enkarterri/Ezkerraldea eta Arratia.
Martxoak 15 (3. kanporaketa). 09:30ean, Ander Deuna Ikastolan, Sopelan. Parte hartzaileak: Uribe Kosta eta Hego Uribe.
Martxoak 21 (4. kanporaketa). 10:30ean, Markina-Xemeingo kultur aretoan. Parte hartzaileak: Lea-Artibai eta Uribe Butroe.
Martxoak 24 (1. finalaurrekoa). 10:00etan, Zallako Zine antzokian. Parte hartzaileak: Lehenengo eta bigarren kanporaketako irabazleak.
Martxoak 28 (2. finalaurrekoa). 12:00etan, Fray Juan de Zumarraga Institutuan, Durangon. Parte hartzaileak: Hirugarren eta laugarren kanporaketako irabazleak.
Martxoak 30 (Finala). 19:00etan, Bilboko BBK Salan. Lehenengo eta bigarren finalaurrekoetako irabazleak.