Mendiz mendi hitzaldi zikloa antolatu dute Mutrikun
Mendizaletasuna herritarrei gerturatzeko helburuarekin, Mendiz mendi emanaldiak hartuko ditu Mutrikuk martxoan. Hitzaldi zikloa Sorginerrekak, Burumendik, EMAk eta Mutrikuko Udalak antolatu dute, eta orain arteko formatuari jarraituz, alpinismoari edo eskaladari buruzko hitzaldiak egingo dira argazki proiekzioekin lagunduta.
Antolatzaileek iragarri dutenez, maila goreneko alpinista eta eskalatzaileen esperientziak gertutik ezagutzeko aukera egongo da ordubete inguruko tartean, eta sarrera doakoa izango da; guztietan 19:30ean jarri dute hitzordua, Gaztetxean. Martxoa osoan lau emanaldi egingo dira, eta hortik bik emakumeak izango dituzte protagonista. “Hitzaldi zikloa martxoan dela ikusita, emakumeei ere keinu egin, eta eurei ere protagonismoa ematea erabaki dugu”.
Emanaldiei dagokienez, horietan lehena bihar [martxoak 9] izango da. Elorrioko Xabier Amorrortu Petra-k Mendian egindako slackline jarduna deritzon hitzaldia eskainiko du. Petra, hain zuzen ere, slackline diziplinan aditua da, eta horri buruz ariko da. “Mendi punta batetik bestera jartzen du zinta, eta highline deritzona egiten du, altuera oso handietan”.
Antolatzaileek jakitera eman dutenez, gainera, hitzaldia egin aurretik slacline tailerra eta erakustaldia egingo dituzte Merkatu Plazan, 17:30etik aurrera. “Zinta batzuk ipiniko ditugu, eta nahi duenak kirola probatzeko aukera ere edukiko du. Sorginerrekako kideok ere erakustaldia egingo dugu, eta Petra bera ere tartean egotea espero dugu”.
Martxoaren 16an, berriz, Emakume alpinista baten bizipenak proiekzioa eskainiko du Gamizeko Gentzane Golzarri Gentzi-k. “Gentzane guretzako idolo eta erreferente bat da eskalada munduan. Baina, tamalez, bere lana ez da oso ezaguna Euskal Herri mailan. Ez du jendaurrean hitzaldirik ematen, baina salbuespen modura, Mutrikun emanaldia ematera animatu dugu. Egia esan, iaz ere saiatu ginen, eta ezetz esan ostean, kostata bada ere aurten proiekzioa emateko konbentzitu dugu”.
Martxoaren 17an, ostera, Mendia nire jolastokia hitzaldia eskainiko du Marina Fernandez madrildarrak. “Marina Fernandezen bizi osoa mendiari lotuta egon da betidanik. Bere gurasoengandik datorkio zaletasuna, eta bere bizipenak kontatuko ditu”.
Hitzaldi zikloa martxoaren 23an amaituko da Alberto Fernandez eta Gorka Lertxundiren Eskalada basatiak Turkian proiekzioarekin. “Turkian horma eta toki berriak ezagutzen ibili dira, eta bertan egin dituzten hainbat eskaladen irudiak ikusteko aukera izango dugu. Bide batzuk ere zabaldu dituzte eta hori kontatuko digute”.
Xabier Amorrortu slackline egiten. Argazkia: Anboto.org
