Lea-Artibaiko taldea Bertsolari Gazteen Sariketatik kanpo geratu da

2017/03/21

Markina-Xemeinen jokatu da gaur [martxoak 21] 25. Bertsolari gazteen BBK sariketaren 4. kanporaketa, Lea-Artibai eta Uribe Butroe taldeen artean. Saioa Markina-Xemeingo kultur aretoan izan da, eta herriko ikastetxe bietako ikasleek bete dute aretoa.

Irabazlea Uribe Butroe taldea izan da, eta sariketa honetan, saioak sailkapen izaerakoak diranez, Lea-Artibai taldeak ez du aurrera jarraituko, eta Uribe Butroe, ostera, finalaurrekoetara pasatu da.

Lea-Artibai taldeko Garazi Nabarro bertsotan. Atzean, ezkerretik eskuinera: Lea-Artibai taldeko Antton Bereziartua eta Bittor Altube eta Uribe Butroeko Txomin Aiartza, Ainhoa Gorostiaga eta Iker Larizgoitia. Argazkia: Bizkaiko Bertsozale Elkartea

Gaurko saioko aurkezlea Maddi Ibaibarriaga izan da eta epaimahaian Jurgi Fuentes, Juanjo Respaldiza eta Miriam Juaristi aritu dira; idazkari lanetan Ione Narbaizak jardun du. Saioa giro ederrean joan da. Lea-Artibaiko taldeko 18 urte arteko hirukoa Garazi Nabarrok, Antxon Berziartuak eta Bittor Altubek osatu dute. 19-24 urte bitarteko taldean egin dute kantuan, bestalde, Nahia Ibarzabalek, Aitor Ruizek eta Aissa Intxaustik. Uribe Butroeren izenean, berriz, Txomin Aiarzak, Ainhoa Gorostiagak eta Iker Larizgoitiak egin dute bertsotan 18 urtetik beherako taldean, eta Jone Larrinagak, Peru Berasategik eta Malen Amenabarrek 19-24 urte bitarteko taldean.

Uribe Butroe taldeko Malen Amenabar bertsotan. Atzean jarrita eskumatik ezkerrera Lea-Artibai taldeko Aissa Intxausti, Aitor Ruiz eta Nahia Ibarzabal bertsolariak. Argazkia: Bizkaiko Bertsozale Elkartea

Lea-Artibaiko taldeak 359 puntu lortu ditu eta Uribe Butroek 394 puntu.

Hurrengo saioa datorren barikuan [martxoak 24] izango da, Zallako Zine Antzokian.