Garaipen bana eskuratu dute Ondarroako eta Isuntzako arraunlariek, bateletan
Bizkaiko batel denboraldiko 7. eta 8. estropadak lehiatu dituzte asteburuan, Bermeon. Horretan, Lea-Artibaiko arraunlariek emaitza onak lortu dituzte: Ondarroakoek eta Lekeitioko Isuntzakoek garaipen bana eraman zuten Lea-Artibaira zapatuan [martxoak 25]. Haur nesketan egin zuen lehenengo Ondarroak, eta luze bakarra egin zuen haur mutiletan, ostera, Isuntzak.
Ondarroako haurrek (nesketan), halaber, bigarren postua eskuratu zuten zapatuan [martxoak 25] eta bigarrena eta hirugarrena, aldiz, domekan [martxoak 26]. Nesketan, gazte eta senior mailan, bestalde, hirugarren egin zuten. Isuntza ere ez zen batere gaizki aritu; bi luze egin zituzten haurren artean (mutiletan), hirugarren egin zuten talde lekeitiarreko arraunlariek. Laugarren postua eskuratu zuten, bestalde, haur mailako neskek, bi estropadetan.
Datorren asteburuan agurtuko dute aurtengo batel denboraldia Sestaon, bertan lehiatuko baitituzte ligako azken estropadak; alegia, bederatzigarren eta hamargarren jardunaldiak.
Bestalde, IX. Ibilbide Luzeko Euskadiko Traineru Txapelketa jokatu zuten zapatuan Pasai San Pedron. Hondarribiak egin zuen lehenengo, eta Ondarroakoak bosgarren. Hamalaugarren postua eskuratu zuen, aldiz, Isuntzak, eta Mutriku 28. postuan geratu zen.
