Umeen Euskal Jaiak kolorez jantzi ditu Lekeitioko kaleak

2017/04/01

Euriak ez ditu dantzariak gelditu gaur [apirilak 1], Lekeition. Herriko Etorkizuna dantza taldearen eskutik Umeen Euskal Jaia ospatu dute egun osoan. Aterruneak aprobetxatu dituzte dantzariek, goizean, jaia kaleetan zehar zabaltzeko. Arratsaldean, berriz, frontoiaren babespean elkartu dira dantzariak eta ikusleak.

Dantzariek gaur goizean egindako kalejira.

Etorkizunak lau talde gonbidatu ditu gaurko jaira, eurekin batera dantzan egiteko: Markina-Xemeingo Zerutxu Dantza Taldea, Basauriko Edurre Dantza Taldea, Elorrioko Besaide Dantza Taldea eta Berrizko San Lorentzo Dantza Taldea. Gelditu bezala, Atean batu dira dantzari guztiak, baina ezin izan dira atera jarritako orduan, euriagatik. Horren ordez, R.M. Azkue Ikastolako jolastokian gorde dira. Hala ere, euria eten duen lehen momentuan prestatu eta kalejiran atera dira herrian zehar. Dantzaldi dotoreak eskaini dituzte ume eta gaztetxoek, baina euriak ez die bakean dantzatzen utzi. Halan, plazako dantzaldia elizpera eraman behar izan dute. Hantxe, aterpean, amaitu dute goizeko erakustaldia bost dantza taldeetako dantzari trebeek. Bazkaltzeko tartea eginda, frontoian batu dira dantzariak, erromeria alaiagaz aurtengo Umeen Euskal Jaiari amaiera emateko.