Munitibartarrek udarako parke osasuntsua edukiko dute
Espazio berdeei buruzko parte hartze prozesuaren barruan, bigarren lan saioa egin zuten zapatuan Munitibarko udaletxean. Besteak beste, Mintegi osteko zelaian parke osasungarria egitea adostu zuten bertan bildutako herritarrek eta udal ordezkariek.
Zehatz esateko, bost soinketa makina desberdin jarriko dituzte, batik bat nagusiei zuzenduta, horiei kirola egiteko aukera zabalduz.
Martxoaren 18an egin zuten lehen lan saioan Bengola aurreko zelaian atseden gunea sortzea erabaki zuten, eta zapatuko bigarren bileran proiektu horren inguruko zenbait erabaki hartu zituzten. “Lehen saioan erabaki batzuk hartu ziren, eta bigarren honetan falta zirenak adostu ditugu”, zehaztu dute udal ordezkariek.
Lehenengo saio hartan, hiru zuhaitz landatzea, hiru mahai jartzea eta Elortzatik Bengola jaisteko pasabidea jartzea adostu zuten, eta zapatukoan, berriz, barbakoa bikoitza jartzea erabaki zuten.
Bengolako atseden gunea eta Mintegi osteko zelaiko soinketa gunea egokitzeko 32.500 euro bideratuko ditu udalak. “Diru sail horretatik 9.500 euro zertara bideratu erabaki behar zen bigarren batzarrean, eta herritarrek Mintegi osteko zelaian adinekoentzat psikomotrizitatea lantzeko makinak jartzea eta Bengolako zelaian barbakoa jartzea erabaki zuten”.
Herriko gai garrantzitsuei buruzko beharrezkoak diren erabakiak herritarren parte hartzeagaz hartzeko Zeuaz prozesuaren barruan, herriko gune berdeei buruzko lan saioek “harrera ona” izan dutela adierazi dute udal ordezkariek: “Herritarrek parte hartu dute; proiektuari buruzko iritzi desberdinak egon dira, baina haien artean adostu, eta haiek erabaki dute zer egin”.
Udal aurrekontuak. Bestalde, udal ordezkariek 2016 aurrekontuen informazioa azaldu zieten bertaratutakoei, eta horregaz batera, 2017rako prestatu duten aurrekontu-zirriborroa aurkeztu zuten.
