Hara! talde ondarrutarrak bere azken diskoa aurkeztu du Bilbon
Biba! kulturgunean eman zuten ezagutzera atzo Adikzioak, minak eta desirak. Izaera indartsua daukan diskoa egin dute Jon Kirru Iparragirrek, Gorka Ruiz Etxano Epi-k eta Julen de Diego Arrizabalagak, rock kutsua daukana. Musikaren oinarrietan rocka, gogortasuna eta garraztasuna dira nagusi, eta diskoko zazpi kantuetan horixe islatzen saiatzen dira.
Dena dela, pop, hard, core, grunje eta punk zertzeladak ere badauzka. Ezezaguna eta Azken argia itzaltzean kantuak bare datozen heinean, beste bost kantuak (Agian, Olibondoak, Zurrupatzen, Hiztegi Mutuak eta Kitzikan) sakon, garratz, eta gogor aurkeztu dituzte. Baga Biga-k ekoiztu du diskoa.
Taldeko musikariek ibilbide luzea daukate, izan ere, Keike eta Xarma taldeetan ibilitakoak dira.
Hara! musika taldeko kideak: Julen de Diego Arrizabalaga, Jon Kirru Iparragirre eta Gorka Ruiz Etxano ‘Epi’.
