Liga irabazteko azken borroka gelditzen zaie Artibai Futbol Taldeko nagusiei

2017/05/02

Igoera lortuta, partida bakarra gelditzen zaie Markina-Xemeingo Artibai Futbol Taldeko nagusiei liga ere lortu ahal izateko. Esku-eskura daukate aukera, gainera. Zapatuan [maiatzak 6], 17:30ean, Fruiz-en kontra jokatuko duten partida irabaziz gero, ligako txapeldunak izango dira. Markina-Xemeingo taldearen eskuetan dago garaipena. Izan ere, tantu bakarrera, aurretik daukaten Loyola Indautxurentzat atseden eguna izango da ligako azken jardunaldia. Hau da, dagoeneko denboraldiko partida guztiak jokatuta dituzte. Beraz, Artibairi dagokio garaipenerako bidea egitea.

Artibai Futbol Taldeko nagusiak Berrizen kontra jokatutako partidaren ondoren igoera ospatzen. Argazkia: Erik Osa Rguez/leartigol

Berdinketak ez die balio, golen arabera, garaipena Loyola Indautxurentzat izango litzateke-eta. Hala, irabaztera behartuak daude ligako kopa eramateko. “Ez da partida erraza izango, baina ilusio guztiagaz, partida irabaztera aterako gara”, adierazi du Iker Santos Artibaiko nagusien entrenatzaileak. Ia denboraldi osoan lehenengo joan dira Artibaikoak, eta azken borroka besterik ez zaie falta, berriz ere lehenengo postua lortzeko. “Partida polita eta emozioz betetakoa izango da”, dio entrenatzaileak. Igoera ospatzen. Orain dela bi asteburu ziurtatu zuten Lurraldeko Lehenengo Mailarako igoera Artibai FTko nagusiek, eta joan den zapatuan [apirilak 29] Markina-Xemeingo Zelaian jokatu duten etxeko azken partidan ospatu zuten ekintza gogoangarria.

Txaranga Barroetako giroa animatzen. Artibai Futbol Taldeko nagusiak Berrizen kontra jokatutako partidaren ondoren igoera ospatzen. Argazkia: Erik Osa Rguez/leartigol

Barroeta futbolzalez bete zen, eta txarangagaz girotu zuten bai partida bera, zein ostean, herrian zehar egin zuten kalejira. “Zapatukoa zoragarria izan zen. Bizi izan dudan ekitaldirik politenetakoa. Taldea, zuzendaritza eta herritarrak oso pozik egon ginen, eta giro on eta futbol edarragaz gozatzeko aukera eduki genuen”, azpimarratu du Santosek. Berrizko taldea izan zuten aurkari, eta 3-0 irabazi zioten, batez ere, bigarren zati bikain bat jokatuta. Fruizen ere, maila horretan ariz gero, aukera asko ditu taldeak liga bere egiteko.