Udaldian herritarrentzat prestatuko duen aparkaleku zerbitzua abiarazi du Lekeitioko Udalak
Aurtengo udan, herritarrentzako prestatutako aparkaleku zerbitzua martxan jarriko du Lekeitioko Udalak. Ekainaren 28tik irailaren 10era bitartean, egun horiek ere barne, bereziki herritarrek erabiltzeko aparkaleku guneak zehaztuko ditu udalak. Astelehenetik barikura 14:30etik 21:00etara herritarrek aparkatu ahalko dute soilik zehaztutako gune horietan.
Lehentasun hori izateko, baina, baldintza batzuk bete beharko dira, eta aparkatzea baimentzen duen txartel bat eskatu behar da herriko Turismo Bulegoan. Eskaerak egiteko epea zabalik egongo da ekainaren 28ra arte, martitzenetik barikura, 10:00etatik 13:30era eta 16:00etatik 18:00etara. Txartelaren prezioa 3 eurokoa izango da.
Guneak. Hiru izango dira Lekeitioko Udalak aparkaleku zerbitzu berezia eskaintzeko egokituko dituen guneak: Paskual Abaroa etorbidea 26-bisetik Talara, eta San Juan Talako; Eusebio Maria de Azkue (San Bizente Ferreretik San Andres auzora) eta Basoaldea, eta Zumatzeta, Buenaventura Zapirain, Otxoa de Urkiza eta Agirre Solarte 1etik 7ra.
Lekeitioko bizilagunek, herrian enpresa bat dutenek edo bertan behar egiten dutenek izango dute txartela eskatzeko aukera. Egitasmo berriaren helburua udaldian udalerritik kanpo behar egiten duten herritarrei aparkaleku aukera zabalago bat eskaintzea dela azaldu du udalak. Izan ere, udatiar askok herrira heltzen direnean autoa aparkatu eta ez dutela gehiago mugitzen esan dute, eta alde horretatik txandatze gehiago egotea lortu nahi dute.
