Ekainaren 10ean inauguratuko dute Markina-Xemeingo Skate Park-a
Lanak amaituta, jadanik erabilgarri dago Markina-Xemeingo skate park berria. Barroeta futbol zelairantz dagoen lursail batean eraiki du Markina-Xemeingo Udalak maila guztietako zaleei zuzendutako bainuontzi formako instalazioa, eta ekainaren 10ean inauguratuko dela aurreratu dute.
Instalazioaren ondoan, erabiltzaileek gunearen erabilpen egokia egiteko, skate park-aren erabiltzeko araudi orokorra biltzen duen informazio panela jarri dute. Bertan jakinarazten denez, skateboard-ak, patinak, scooter patineteak eta BTX bizikletak soilik erabili ahal dira instalazioan. Gainera, derrigorrezkoa da babesgarriak (kaskoa, belaunetakoak…) erabiltzea.
Bestalde, 12 urtetik beherakoek ezingo dute instalazioa erabili, nagusi batek lagunduta ez bada, eta animaliarik ezingo da sartu espazioan. Euria denean edo lurzorua bustita dagoenean berriz, parkea ezin dela erabili ohartarazi dute.
Ordutegi jakin bat izango du guneak: 8:00etatik 22:00etara udan, eta 20:00ak arte gainontzeko urte sasoietan. Azkenik, erabiltzaileei gunea eta ingurua garbi mantentzea eskatzen zaie. “Zaborrik ez botatzea eta instalazioetan pintadarik ez egitea; azken finean, guztion gozamenerako den espazioa zaintzea” azaldu du udalak. Horretarako, laster, zabor-ontziak eta eserlekuak jarriko dituztela jakitera eman dute.
Markina-Xemeingo Skate Park-a. Argazkia: Markina-Xemeingo Udala
Skate Park-eko araudia. Argazkia: Markina-Xemeingo Udala
