Ondarroako Kamiñazpi auzoko jaiak, euripean baina giro onean

Mikel Santiso

2017/06/03

Atzo [ekainak 2] arratsaldean hasi ziren Kamiñazpiko jaiak, txupinazoagaz. Momentu horretatik aurrera festari ekin zioten auzotarrek, eta mota guztietako ekintzez gozatzeko aukera eduki dute. Bariku iluntzea musikari eskaini zioten Kamiñazpin. Lehenengo Unanue Udal Musika Eskolako ikasleek pop-rock kontzertua eskaini zuten, eta ondoren play-back lehiaketak jendetza bildu zuen karparen azpian. Aurten 12 talde aurkeztu dira dira lehiaketara. Barikuko egitarauari amaiera emateko, gerturatutako guztiak dantzan jarri zituen Emepebo5t taldeak. Gaur [ekainak 3], kirol ekintzek hartu dute goiza. Auzoko XIII. Pala Txapelketa jokatu da 12 bikoteren artean, eta Aitor Ormazabal eta Unax Vidalek osatutako bikoteak irabazi du finala, Xabier Arrizabalaga eta Xabat Ibarlozaren aurka 22-14 gailenduz. Bien bitartean, puzgarriez eta bizikleta ginkanaz gozatzeko aukera eduki dute txikienek parkean. Txistulariek ere ohi duten ibilbidea egin dute auzoko kale artetik. Eguerdian, paellak prestatzeko momentua iritsi da. Trikitilariek girotuta, 370 lagun baino gehiagorentzat prestatu dute bazkaria zerrendan izena eman zuten 21 taldeek, gune osoan usain gozoa zabalduz. Karpan jarritako mahaiak bete-bete egin dira. Bazkalostea bertsolariek girotu dute. Baina bazkaldu ondoren beste ekintza batzuk ere egon dira. Zubi Zahar Herri Ikastolan Kamiñazpiko Mus Txapelketa jokatu baitute. Bien bitartean, zezen txikiekin eta poneyekin jolasteko aukera egon da gazteenentzat frontoian. Txirrimorraskikoekin jolasak egiteko aukera edo zineaz gozatzeko aukera ere ez dira falta izan arratsaldean, urtero legez. Gauean, Itzalak talde ondarrutarrak eta Willis Drummondek girotuko dute Kamiñazpi. Jaiari bukaera emateko, Dj Jotatxo igoko da eszenatokira, bertaratutakoak dantzan jartzera. Bien bitartean, jaiak aurrera darrai Kamiñazpin.