Irati Lasarte Akarregi, Euskadiko Txapeldun taldeka eta azpitxapeldun bakarka
Gimnastikalari ondarrutarrak zapatuan [ekainak 3] lehiatu zuen Euskadiko Txapelketa Durangoko Landako kiroldegian. Horretan, Lasartek bakarka zein taldeka parte hartu zuen; taldeka Ordiziko taldeagaz aritzen da ondarrutarra. Hain justu, taldekako txapelketan lehenengo postua lortu dute Lasartek eta haren taldekideek. Bakarka, ostera, Euskadiko azpitxapeldun geratu da ondarrutarra.
Lasartek sokagaz eta uztaiagaz parte hartu zuen bakarkako txapelketan; sokagaz lehenengo postuan geratu zen eta uztaiagaz laugarren. Sailkapen orokorrean, beraz, bigarren postua lortu zuen (Euskadiko azpitxapelduna).
Gimnastikalari ondarrutarrarentzako ez da estreinako aldia taldeka Euskadiko txapelketa irabazten duena. Izan ere, aurtengoagaz, hirugarren urtez jarraian izan da txapeldun; 2015. urtean Ipurua taldeagaz izan zen txapeldun, eta iaz eta aurten Ordiziko taldeagaz.
Aurtengo deboraldia borobila izan da Lasarterentzat: Donostiako Txapelketan lehen postua lortu zuen taldeka, Iruñesa Txapelketan txapelduna izan zen bakarka (uztaiagaz) eta Gipuzkoako Txapelketan taldeka txapeldunak izan ziren eta bakarka bosgarren egin zuen.
Lasarte, ezkerretik lehenengoa, bakarkako podiumean.
