Lekeitio BHI-k salatu du erdaraz eginarazi dietela legebiltzarreko ertzainek
Eusko Legebiltzarrera gutun bat bidali dute Lekeitioko institututik, parlamentura egindako bisita batean izandako arazoak salatzeko. Maiatzaren 10ean joan ziren legebiltzarrera. «Bisitari hasiera emateko nahian, sarreran dagoen bulegoan zeuden ertzain birengana abiatu ginen. ‘Egun on, Lekeitioko institututik gatoz…’ esan orduko, euretariko batek ‘En castellano por favor‘ erantzun zigun». Hala kontatu dute BERRIAk eskuratu duen gutunean. Erdaraz aritu behar izan zuten, «harrituta eta deseroso». Parlamentuak gutuna bidaliko die barkamen eske.
Legebiltzarreko mahaiak kasua aztertu du. Erabaki zuten eskutitz bat bidaltzea, barkamen eske, eta azalpenak ematea «legebiltzarrak hizkuntza normalizazioa lortzeko egiten dituen ahaleginez»Bi eskutitz bidali dituzte institututik: bat, bisitara joan ziren irakasleek; bestea, ikasleek. Bide beretik jo dute bi gutunetan. Irakasleek «pena» azaldu dute bizi izandakoagatik. «Gauza hauek askoz gehiago zaindu behar dira». Eskatu dute «bermatuta» egon dadila bi hizkuntza ofizialen erabilera. Ikasleek zera adierazi dute: «Ez dugu ulertzen zergatik ez daukagun eskubidea bermatuta gure hizkuntza den euskaraz hitz egiteko». Ohartarazi dute «larriagoa» dela eskubide urraketa hori parlamentuan gertatu izana. Erakundearen irudia. Legebiltzarreko mahaiak kasua aztertu du. Erabaki zuten eskutitz bat bidaltzea, barkamen eske, eta azalpenak ematea «legebiltzarrak hizkuntza normalizazioa lortzeko egiten dituen ahaleginez». Beste eskari bat ere egin zuten EH Bilduko eta Elkarrekin Podemoseko ordezkariek, aktan jasoa dagoenez: legebiltzarrak Segurtasun Sailari eskatzea berma dezala bi hizkuntzak erabiltzeko eskubidea. Ez zuen hori erabaki mahaiak. Legebiltzarreko euskara planean jasoa dago harrerako ertzainen arazoa. Dio herritarrek ertzain horiekin dutela «lehen kontaktua» parlamentura joaten direnean. «Gauza nabaria da zerbitzu horretako langileen euskara ezagutza eta erabilera urri samarra dela». Horren ondorioez ere mintzo da plana: «Errealitate horrek garrantzia du, euskararen normalizaziorako ez ezik, erakundeak eskaintzen duen irudirako ere». Izatez, neurrien artean jasoa dago «segurtasun gunearen euskararen erabilera normalizatzea», horretarako «protokoloa» sorturik. Legebiltzarreko presidentetzarekin harremanetan jarrita, adierazi dute «ahaleginak» egiten ari direla txanda bakoitzean gutxienez ertzain elebidun bat egoteko. Oraingoz, ez da denetan betetzen. Joan den legealdian EH Bilduk galdera egin zion Segurtasun Sailari. Hark erantzun zuen «lehentasunezkotzat» jo dutela unitate hori: gehitu egingo direla hizkuntza eskakizunen derrigortasunak, eta prestakuntza emango dietela.
