Emaitza onak lortu ditu Tximistak asteburuan
Lekeitioko Tximista atletismo taldeak urte guztian egindako lanaren emaitza onak ikusi ditu asteburu honetan ere. Durangon eta Burgosen egon dira atletak; alde batetik, Kadeteen Bizkaiko Txapelketa jokatu zuten Durangon bariku arratsaldean [ekainak 9] eta zapatu goizean [ekainak 10]. Beste alde batetik, Irati Agirregomezkorta eta Ainara Plaza Burgosen egon dira Bidezabal taldearekin batera Espainiako liga jokatzen. Horrez gain, Paul Lauzirikak eta Mikel Dolaragak 2. mailako txapelketa lehiatu zuten domeka goizean [ekainak 11] Durangon.
Kadete mailako neska mutilak bikain aritu zirela azpimarratu dute Tximista atletismo taldeko arduradunek. “Denek bere marka pertsonalak hobetu zituzten eta 8 dominekin bueltatu ziren etxera”. Horrez gain, Irati Iriondok Espainiako txapelketan parte hartzeko gutxieneko marka egin zuen 100m leunetan, 12.95 eko denboragaz.
Irati Agirregomezkorta eta Ainara Plaza Burgosen egon ziren. “Bidezabal taldeagaz aritu dira ligan eta emaitza zoragarriarekin bueltatu dira. Mailako txapeldunak izan dira eta datorren urten estatu mailako maila gorenean arituko dira, Ohorezko mailan”. Arratsaldean, gainera, Irati Agirregomezkortak 59.83ko marka lortu zuen Gasteizen 400m leunetan.
Paul Lauzirikak, berriz, 1,70 marka lortu zuen domeka goizean lehiatu zen Espainiar estatuko bigarren mailako txapelketako altuera jauzian eta Mikel Dolaragak 4×400 metroko erreleboan parte hartu eta irabazi zuen.
Tximista atletismo taldeko kadeteak. Argazkia: Tximista
Ainara Plaza eta Irati Agirregomezkorta. Argazkia: Tximista
