40 urtez, Bermeon esku pilota sustatzeko lanean
1976tik esku pilotarekiko zaletasuna zabaltzen dihardu Artza Pilota Elkarteak. Horixe izan da sorreratik kideen helburua. Hurrengo ikasturtean pala eta frontenis ikastaroak eman gura dituzte.Artza Pilota Elkartea 1976. urteko udan sortu zuten, eta ordu...
1976tik esku pilotarekiko zaletasuna zabaltzen dihardu Artza Pilota Elkarteak. Horixe izan da sorreratik kideen helburua. Hurrengo ikasturtean pala eta frontenis ikastaroak eman gura dituzte.
Artza Pilota Elkartea 1976. urteko udan sortu zuten, eta ordutik, herritar asko pasatu dira bertatik. Esku pilotan jokatzen ikasiz, zaletasuna barneratu dute askok eta askok elkarteari esker. Hain zuzen, elkarteko kideek herrian pilota zaletasuna zabaltzea izan dute helburu sorreratik.Zeregin horretan ahalegin eta lan garrantzitsua egiten dute urte guztian, eta hurrengo ikasturterako esku pilotagaz batera, pala eta frontenis ikastaroak eskaintzeko asmoa daukate.
Artza Pilota Elkartearen ordezkariek udalerriko ume eta gaztetxoak Artza frontoira hurbiltzera animatu dituzte, esku pilota gertutik ezagutu eta probatzeko.
Gaur egun 56 pilotari dituzte elkartean, eta neska batzuk badaude ere, gehienak mutilak dira. Horregatik, bereziki neskei frontoira joatera animatzeko deia luzatu diete.
«Esku pilota guztiontzako kirola da, eta garrantzitsua da Bermeon zaletasuna mantentzea. Horretarako ezinbestekoa da belaunaldi berriak kirol hau egitera animatzea», azpimarratu dute.
56 pilotarietatik, 12 benjamin kategorian daude, 8 alebinetan, 11 txikietan, 9 kadeteetan, 5 gazteteetan eta 11 seniorretan.
Hiru entrenatzailegaz osaturiko lan taldeagaz, astelehenetik barikura alde teknikoa lantzen dute frontoian.
Era berean, Eleizalde Ikastolan eta San Frantzisko Ikastetxean eskolaz kanpoko ekintzen barruan esku pilota ikastaroak ematen dituzte, eta datorren ikasturtean Sagrado Corazon Ikastetxean ere eskaintzea aurreikusi dute.
Pilota jaialdiak antolatzen
Gainera, Bermeoko Udalaren eta Bermeoko jai batzordearen laguntzagaz, Andra Mari eta Santa Eufemia jaietan bi esku pilota jaialdi antolatzen ditu. Horietan Axpe eta Asergace enpresetako pilotari profesionalen jokoaz gozatzeko aukera izaten dute herriko zein inguruetako herrietako pilotazaleek.
Era berean, Bizkaiko Pilota Federazioagaz batera bi ekimen antolatzen dituzte irailean.
Artza Pilota Elkarteko ume eta gaztetxoek honako txapelketetan parte hartzen dute: Eskuz Banakako Bizkaiko Eskolarteko Txapelketan, Eskuz Binakako Bizkaiko Eskolarteko Txapelketan, Kluben arteko Bizkaiko Txapelketa (eskuz banaka, eskuz binaka eta palan, gomazko pilotagaz), Trinketeko Bizkaiko Txa- pelketan, Cup Bizkaia Txapelketan (eskuz binaka eta palan, gomazko pilotagaz), Herriarteko Txapelketan, esku pilotako Open Bizkaian eta Cafe Baque Txapelketan.
