Lekeitioko institutuko eraikin eraberritua inauguratu dute

2017/06/21

Lekeitio BHIk joan den ikasturtean eraberritu zuten institutuko eraikinaren inaugurazioa egin du gaur [ekainak 21] goizean, jai giroan. Lekeitio BHIko ikasle, irakasle, zuzendari eta arduradunez gain, Olatz Garamendi Eusko Jaurlaritzako Administrazio eta Zerbitzuen sailburuordea, Koldo Goitia, Garbiñe Saenz de Buruaga eta Jesus Mari Anakabe Lekeitio, Ispaster eta Mendexako alkateak, Ana Isabel Ferri Bizkaiko Hezkuntza Delegatua, Josu Orue Inspektorea, Berritzeguneko kideak eta Lea-Artibaiko beste ikastetxe batzuetako zuzendari eta ordezkariak elkartu dira besteak beste, ekitaldian.

Lekeitio BHIren inaugurazio ekitaldia.

Institutuko ikasleek musika emanaldi bereziak eskaini dituzte, hasteko frontoian, flauta, txistu, klarinete eta oraganoaren laguntzagaz, eta institutuko ordezkariek hartu dute hitza ondoren. Eraikinaren berrikuntzagaz gainera, esku artean duten hezkuntza proiektu berria ere azaldu dute. Oinarrizko baloreak direla Lekeitio BHIn gehien lantzen dituztenak esan dute. Emaitza akademikoez gain, guztiaren gainetik ikasleak pertsona onak izaten laguntzea dutela helburu nabarmendu dute, eta horretarako oinarrizko balioetan hezitzen lagunduko duen proiektu berri bat egin dute denen artean, prozesu parte hartzaile baten bidez. Beste proiektu bat ere aurkeztu dute: Batuz izena jarri dioten Lea-Artibaiko Herri Ikastetxeen Sarea. Orain arte bakoitza bere aldetik ibili dela esan dute, eta orain, eskola txikiak, eskolak eta Lea-Artibaiko hiru institutuak indarrak batu eta sare publikoa osatu dute.

Jaurlaritza, delagaritza, udaletxe eta beste ikastetxeetako ordezkariak egon dira Lekeitio BHIren inaugurazioan.

Jaurlaritza, delegaritza, udal eta beste ikastetxeetako ordezkariak egon dira, gaur, Lekeitio BHIren inaugurazioan.

Horrez gain, Lagunkide proiektuko sariak emateko parada ere izan da inaugurazioa. Institutuko elkarbizitza hobetzeko lanean ibili dira ikasleak ikasturte osoan. Baztertuta zegoenari taldera hurreratzen lagundu diote jolasen bidez eta eskua luzatuz. Asko izan zirela esan dute institutuko arduradunek Lagunkiden parte hartzeko izena eman zutenak, baina hamar ikaslek izan dute aurten erantzukizun hori, eta diploma banagaz saritu dituzte. “Esan beharra dago benetako gogoa eta trebetasuna erakutsi duzuela zuon artean harreman osasuntsuak sustatzen. Horri esker, aurten, ikasle asko hobeto sentitu dira, institutuko giroa hobetu egin da”. Handiagoa. Proiektuak aurkeztuta, beste tarte bat eman diote musikari, eta institutuko berrikuntzak bisitatuz amaitu da inaugurazioa. Jantoki eta gimnasio berria eta sei bat gela berri ditu eraikinak orain. Eraikinaren ertz bietan jardun dute batez ere, eta barruko banaketan ere aldaketak izan dituztela jakitera eman dute Lekeitio BHIko arduradunek.