Mendizabalek eta Aldazabalek ezustekoa eman dute Fernando Diez Barroso txapelketaren lehen partiduan
Ez ziren faboritoak, baina Olharan eta Etxeto erraz hartu zituzten mendean. Mutrikuarra eta berriatuarra 30-22 nagusitu ziren Olharan eta Etxetoren kontra.
Beste behin Mendizabalek jokatzerakoan erakusten duen erraztasuna ikusi zen kantxan, eta Aldazabalen segurtasuna eta errebes bikaina ere agerian geratu ziren. Aurkariak partidua irabazten saiatu ziren, baina ezin izan zuten beste norgehiagoka batzuetan erakutsi duten maila eman.
Mexiko frontoian atzo jokatu zuten lehenengo jardunaldia. Nazioarteko Torneoko lehen jardunaldiko beste partidua Barandika-Lekerika eta Egiguren-Lopez bikoteen artekoa izan zen, azken horiek 30-14 irabazi zuten.
Gernikarren partiduari dagokionez, haien aurkariek partidu hasieratik hartu zuten aurrea markagailuan. Barandikak eta Lekerikak seina berdintzea lortu zuten, baina hurrengo tantoak erraz lortu zituzten Egigurenek eta Lopezek. Esate baterako, Egigurenek eskuin-errebote eta bi pareta ederrak eskaini zituen, eta Lopezek ere erakustaldia emanda ikusleak gozarazi zituen. Hala, gernikarrei haien jokoa frontoira egokitzea kostatu zitzaien, baina haien dohainak erakusteko aukera izan zuten zenbait momentutan.
Mexiko frontoiko puntistak. Fernando Diez Barroso Nazioarteko Txapelketagaz batera, Mexikoko frontoiko pilotarien arteko torneoa hasi zen atzo [ekainak 28].
Bi partidu jokatu zituzten. Batean Aaronek eta Ekhik 15-8 irabazi zieten Sierrari eta Businellori, eta bestean Christophe-Perez bikotea 15-11 nagusitu zen Juan Leon-Osorno bikotearen kontra.
Jai Alai World Tour. Bestalde, aurtengo Jai Alai World Tour zirkuiturako Gernika Jai Alai taldea osatu dute dagoeneko. Diego Beaskoetxea, Alex Hormaetxea, Aritz Erkiaga eta Xabi Barandika dira aurrelariak, eta Ibon Aldazabal, Unai Lekerika, Ekhi Martinez eta Erik Irastorza atzelariak.
Erik-Aldazabal eta Olharan-Etxeto bikoteak. Argazkia: Jai Alai News.
Barandika-Lekerika eta Egiguren-Lopez bikoteak.
Argazkia: Jai Alai News.
