Gizon bat atxilotu dute Ondarroan, ustez etxe batean lapurreta egitearren
Atzo goizean [uztailak 2] atxilotu zuten ertzainek ustezko lapurra, 42 urteko gizon bat. Ustez, indarrez sartu zen lursail bateko etxebizitza batera. Kaltetuak, 10:30ak inguruan deitu zuen Ondarroako Ertzain-etxera, lapurreta jasan zuela esanez. Eusko Jaurlaritzako Segurtasun Sailaren esanetan, atxilotuak barra bat erabili zuen eraikineko leiho bat behartzeko, eta etxearen ondoko materialak biltzeko etxolako atea ere behartu zuen.
Ertzainak, lapurraren bila hasi ziren, eta etxetik hurbil, gizon bat aurkitu zuten, lo-zaku bat, kazola bat, eskuargi bat, kontserba latak eta erlijio-irudi bat zituena. Baieztatu ahal izan zuten aipatutako guztia etxean lapurtutako materiala zela. Motxilaren barruan, eskularru batzuk eta ustez etxeko leihoa eta etxolako atea indarrez zabaltzeko erabilitako 80 bat zentimetroko barra bat ere bazeramatzan gizonak.
Ebidentzia hauekin, ustezko lapurra atxilotu egin zuen Ertzaintzak. Gainera, aurrekariak ere baditu beste zenbait lapurreta egitearren. Gainera, epaitegien zenbait agindu ere betetzeke zeuzkan atxilotuak. Lapurtutako material guztia jadanik jabearen esku dagoela baieztatu du Segurtasun Sailak.
