Pablo Fdez. Arrietaren kontzertuagaz hasiko da Markina-Xemeingo I. Jazz jaialdia

2017/07/03

Markina-Xemeindar batek zabaldu eta markina-xemeindar batek zarratuko du eguenetik [uztailak 6] domekara [uztailak 9] luzatuko den Markina-Xemeingo I. Jazz jaialdia; Pablo Fdez. Arrietagaz hasiko da jaialdia eta Haizea Martiartuk emango dio amaiera. Tartean Victor de Diego bezalako jazz maisu handiaren eta musika eta dantza uztartuko dituen Bilbao Lindy Band-en emanaldiak egongo dira. Gaur goizean [uztailak 3] egin dute aurkezpena, Uhagon kulturguneko terrazan, jaialdia antolatu duten Uhagon kultur elkarteko kideek eta jazz jaialdiari hasiera emango dion Pablo Fdez. Arrieta musikariak. Markina-Xemeingo jazz jaialdia ilusio handiagaz jaio dela aitortu dute antolatzaileek, eta apurka-apurka hazten joan eta inguruan erreferente kultural bihurtzea lortu nahi dute.

Markina-Xemeingo I. Jazz jaialdiaren aurkezpena. Tere Bringas eta Aintzane Gandiaga Uhagon kulturguneko arduradunak eta Pablo Fdez. Arrieta musikaria kulturguneko berdegunean.

Kanpoan izango dira kontzertu guztiak, doan. Izan ere, kontzertuak emateko ingurune aproposa dauka Uhagon kulturguneak eta beraz, uda partea aukeratu dute publikoak musikagaz zein ingurunegaz gozatu ahal izateko. Mimo guztiagaz prestatu du Uhagoneko kontzertua Pablo Fdez. Arrietak. Jazz musikari ezberdinak batu ditu Uhagoneko kontzerturako; hala, Markina-Xemeingo musikariagaz batera David Mengual kontrabaxua eta Carlos Sagi bateria igoko dira oholtza gainera. Horrez gain, Carme Canela abeslaria ere batuko zaio hirukoari. “Abeslari bat ekartzea zen ideia, eta Carme Canela etorri zitzaidan burura niretzat jazz munduko abeslari oso ona da eta”. Pablo Fdez. Arrieta Carme Canelagaz egon da Bartzelonan, eta estandar batzuk erabaki dituzte kontzerturako. Horrez gain, bolero bat ere sortu du herriko musikariak, Bolero de Perico izenekoa, espreski jazzaldirako. “Oso polita geratu dela uste dut”, dio. Egitarau berezia prestatu dute jazz standarra zer den ezagutzera emateko, eta kanta bakoitzaren azalpena eramango duen eskuko programa bategaz lagunduta egongo da gainera. “Kontzertu batzuetan ematen dute eskuorri bat kantak ezagutu eta ulertzen laguntzeko eta horrelako bat prestatu dugu”. Beraz, Pablo Fdez. Arrietaren kontzertura doazenek abestien jarraipena ere egin ahal izango dute eskuorriarekin. “Ohiko hirukoa gara: gitarra, kontrabaxua eta bateria gehi Carme Canelaren ahotsa”. Estreineko aldia da Pablo Fdez. Arrietak Carme Canelagaz lan egiten duela. Ezagutzen zuen aurretik, baina bien arteko fusioa entzuteko lehen aukera izango da Uhagonekoa.

“Jazzaren munduan bestalde, emakume abeslari garrantzitsuak egon dira eta hori ere gogoan eduki dugu”.

Jazz estilo ezberdinak. Jazz mundua gizonezkoei alde batetik, eta instrumentuei, bestetik oso lotua dagoela ere ikusten zuten Uhagon kulturgunekoek, eta beraz, emakumeen presentzia indartu eta abeslari bat ekartzeari bide eman diote. “Zapatuan egongo den Bilbao Lindy Band-en kontzertuan Elsa Lizundia saxofoi jotzailea ere badago eta Haizea Martiartu ere bai. Jazzaren munduan bestalde, emakume abeslari garrantzitsuak egon dira eta hori ere gogoan eduki dugu”, azaldu dute. Egitarau aldetik instrumento eta estilo ezberdinak barneratzen ahalegindu dira. “Victor de Diegok kontzertua eskainiko du barikuan [uztailak 7] eta zapatuan [uztailak 8] masterclass bat emango dute nahi duen guztiarentzat; musika ikasle, irakasle edo interesa duen edonorentzat”. Doanik izango da, 11:00etan hasita, pare bat orduz. “Hiru musikoak doinu ezberdinak jo eta komentatu egingo dituzte, besteak beste”. Zapatu iluntzean dantza ikastaro bat eta kontzertu, dantza eta jaia batuko dituen emanaldia egongo dela aurreratu dute antolatzaileek. “Lindy Hop swing estiloko dantza oso modan dago hiri handietan eta bertara ekarriko dugu Charlotte Gerard irakaslearen eskutik”. Oinarrizko pausoak ikasi eta gero, Bilbao Lindy Band-ek joko du. New Orleans estiloan. Domekakoa [uztailak 9], berriz, dixia izango dela aitatu dute. “Kalez kale ibiliko dira Haizea Martiartu eta The Dixie Monsters taldekoak. Oso musika alaia joko dute, New Orleans-eko musika”. Kulturguneko berdeguneko zedro azpian jarriko dute oholtza, eta kontzertuak 20:30ean hasiko dira, domekakoa ezik. 13:00etan hasiko da kalejira, Arkupean. Eskerrak emanez amaitu dute gaurko aurkezpena Uhagoneko kideek. “Eskerrak nahi dizkiegu Markina-Xemeingo Udalari, Bizkaiko Foru Aldundiari, Kutxabank, Kris ileapaindegia eta San Miguel garagardoei, eurek barik jaialdi hau aurrera ateratzea ezinezkoa izango litzatekeelako”. EGITARAUA

EGUENA [Uztailak 6], 20:30: Pablo Fdez. Arrieta Trio & Carme Canela: Pablo Fdez. Arrieta gitarra, David Mengual kontrabaxua, Carlos Sagi bateria eta Carme Canela ahotsa. Laukote hau, jaialdi honetarako elkartu da bereziki.
BARIKUA [Uztailak 7], 20:30: Victor de Diego Organ Trio: Victor De Diego saxo, tenore eta sopranoa, Abel Boquera organoa eta Carlos Falanga bateria.
ZAPATUA [uztailak 8], 11:00: Masterclass Victor de Diego Triorekin 20:00: Bilbao Lindy Band musika eta dantza. Lindy Hop dantza klase irekia Charlotte Gerad irakasleagaz, eta ondoren, Bilbao Lindy Band: Carla Sevilla ahotsa, Elsa Lizundia saxo tenorea, Mikel Nuñez pianoa, Mikel Azkargorta baxua eta Carlos Sagi bateria.
DOMEKA [uztailak 9], 13:00: Haizea Martiartu & The Dixie Monsters: Haizea Martiartu saxo sopranoa, Eva Garin tronboia, Juan De Diego tronpeta, Arnau Gil banjoa, Julio Marques saxo baritonoa eta Arnau Julia perkusioa.