Astelehenean itsasoan galdu zen lekeitiarraren bila jarraitzen dute
Atzo Bermeo eta Lemoiz inguruetan ibili ziren miatzen. Hiru ontzi, bi helikoptero, hegazkin bat eta lurreko patruilak ari dira parte hartzen bilaketa lanetanMartitzen gauean bilaketa lanak eten eta gero, atzo, 09:00etan berriro ere astelehenean itsasoa...
Atzo Bermeo eta Lemoiz inguruetan ibili ziren miatzen. Hiru ontzi, bi helikoptero, hegazkin bat eta lurreko patruilak ari dira parte hartzen bilaketa lanetan
Martitzen gauean bilaketa lanak eten eta gero, atzo, 09:00etan berriro ere astelehenean itsasoan galdu zen 57 urteko gizonezko lekeitiarra bilatzeko lanei ekin zieten salbamendu taldeek.Bilaketa lanak itsasontziz, helikopteroz eta hegazkinez ari dira egiten. Baina momentuz ez dute ez gizonezkoaren ezta haren ontzi txikiaren arrastorik aurkitu. «Atzo Bermeo eta Lemoiz inguruak miatzen ibili ziren, baina ez zuten arrakastarik eduki».
Itsas Salbamenduko Monte Gorbea eta Alcyone ontziak, Helimer 213 helikopeteroa eta Sasemar 102 hegazkina ari dira bilaketa lanetan. Horiei guztiei Ertzaintzaren helikoptero bat, lurreko patruilak eta Gurutze Gorriaren Izaro I ontzia gehitu behar zaizkie.
Itsas Salbamenduko kideek argitu dutenez, 04:00etan itsasora ateratzeko eta 16:00etan itzultzeko ohitura zuen gizonezkoak. Eta normalean egin modura, astelehenean ere 04:00ak aldera atera zen itsasora Espe Primero izeneko zazpi metroko ontzi txikian. Herenegun, itzultzen ez zela ikusita, senide batek abisua eman zuen.
Bilaketa lanen protokoloa
HITZAk papereko edizioa amaitu zuenean, oraindik inolako berririk barik jarraitzen zuten salbamendu taldeek. Dena dela, Ertzaintzak azaldu zuenez, bilaketetarako daukaten protokoloa jarraituz, ilundu orduko bilaketa lanak etetekoak ziren, 21:00ak 22:00ak aldera, hain zuzen; eta berritasunik egon ezean, gaur 09:00etan ekingo diete berriro ere lanei.
