Eliz-Atea kale osoa berrituko du Lekeitioko Udalak
Gasolindegi eta Eliz-Atea kale ingurua hobetzeko pausoak ematen hasi da Lekeitioko Udala. Hasteko, 2015 urtean egindako Gasolindegi eta Eliz-Atearen gunea berriztatzeko proiektua berreskuratzea eta eguneratzea erabaki du. Azaldu dutenez, proiektu horregaz urteetan auzokideek egindako eskariari irtenbidea eman nahi diote, gune horretako iriste erraztasuna hobetuz eta zaharkitutako ingurua berrituz.
Egitasmoa eguneratu eta hobekuntza batzuk sartzeko, proiektua berridaztea erabaki du udalak. Horrela, aldaketekin, esku hartzea Eliz-Atea kale osora zabalduko dute, Gazteguneraino. “Hasierako proiektuan obrak Eliz-Atea 4 atetaraino bakarrik egitea aurreikusten zen”, zehaztu dute.
Horrez gain, hasierako proiektuan eliza aldean egitea aurreikusten zen oinezkoentzako losa lekuz aldatu eta etxebizitzen atarien aldean egitea erabaki dute. “Ibilgailuentzako bidea eta oinezkoentzako losa maila berdinean joango dira, Atea kaletik Eskolaperaino dagoen moduan”. Helburua oztopo arkitektonikoak ezabatu eta iriste erraztasuna hobetzea dela azpimarratu dute.
Eliz-Atea kalea.
