Txapel jaurtiketak girotuta etorri da Berriatuko Milloi auzora San Antolin eguna

2017/09/02

Giro ederrean ari dira ospatzen berriatuarrak San Antolin jaiak. XIV. Txapel Jaurtiketak girotuta etorri da gaurkoan [irailak 2] santuaren eguna. 16 ume-gaztetxok eta 30 nagusik parte hartu dute sariketan, eta tiraldiz tiraldi, Danel Gogenola eta Josu Urien Miño izan dira nagusi, hurrenez hurren. Imanol Mugartegi alkate ohia izan da azpitxapelduna nagusien mailan. Auzoko elkartean bazkaritan bildu dira 14:30ak aldera, arratsaldean briska txapelketari eta umeen jolasei tartea egin aurretik. Atzo arratsaldean [irailak 1] eman zioten jaiei hasiera, kanpai jotze, ikurrinaren igoera eta txapligu jaurtiketagaz. Pintxo potean bildu ziren ondoren, eta haren atzetik, 22. Mus Txapelketa egon zen jokoan. Beste mus txapelketa bat eta Lekeitioko jaien hasiera tarteko, iaz baino parte hartzaile gutxiago aritu ziren karta jokoan; 28 izan ziren guztira –iaz 40–. Finalean, “inoiz ez bezala”, lau bikote berriatuar: Jon Aldazabal Susteta eta Oier Arregi Altxu batetik, eta Andoni eta Joseba Malaxetxebarria, bestetik. Lehengoek eskuratu zuten lehen saria: 300 euro eta txapelak.