Arantza Burgoa eta Asier Astigarraga, Euskadiko esprint triatloiko txapeldun euren mailetan
Koaxi Triatloi Taldeko bi kirolariak Zumaian zapatuan jokatutako esprint triatloian nagusitu egin ziren, bakoitza bere mailan. Burgoak, ordu bete eta 12 minutu behar izan zituen zirkuitua osatzeko, eta neska beteranoen V2 mailan txapeldun izatea lortu zuen. Astigarragak berriz, 58 minutu eta 16 segundoko denbora eginda mutil beteranoen V1 mailan garaipena lortu zuen. 750 metro igerian, 20 kilometro bizikletan eta 5 kilometro korrika egin behar izan zituzten Zumaian.
Sailkapen orokorrean zazpigarren emakumea izan zen Burgoa. Igerian, 12 minutu pasatxo egin zituen, bizikletan 38 minutu eta korrika berriz 22 minutu eta 27 segundo. Astigarraga, 13. sailkatua izan zen mutilen artean. 10 minutu eta 7 segundo behar izan zituen igeriko zatia amaitzeko, 30 minutu eta erdi bizikletako zatia egiteko eta 17 minutu eta 44 segundo korrikaldia amaitzeko.
Beteranoen V3 mailan berriz, Garraitz Kirol Taldeko Iñaki Lasarte bigarren postuan sailkatu zen. 14:47 minutu egin zituen igerian, 35 minutu eta 41 segundo bizikletan eta 23 minutu eta erdi korrika. Ander Okamika lekeitiarra laugarren postuan geratu zen sailkapen orokorrean.
Euskadiko esprint txapelketatik Koaxiko taldekideek ekarri zuten albisterik txarrena Nagore Eluk proba utzi behar izana izan zen, bizikletako segmentuan bi zulatu izan baitzituen gurpiletan.
Burgoa eta Astigarraga, zapatuan, proba amaitu ostean, sariekin. Argazkia: Ondarroako Kirolaren Leihoa
