Zapatuan hasiko du liga txapelketa Mutriku Futbol Taldeko Ohorezko Mailako taldeak
Real Union “B” taldearen aurka hasiko dute 2017/2018 denboraldia mutrikuarrek, Irungo Stadium Gal zelaian. Bigarren jardunaldian jokatuko dute etxeko lehen partidua, Amaikak Bat talde debarraren aurka, San Migelen.
Igor Elezgarai “Txaparro” izango da aurten ere entrenatzailea, eta Aitor Vicente izango da bere laguntzailea. Atezainen entrenatzaile lanetan iazko denboraldira arte atezaina izan zen Mikel Illarramendi arituko da.
20 bat jokalarik osatuko dute Gipuzkoako Ohorezko Mailan jokatuko duen taldea: Mutrikuko bigarren taldetik Eneko Goenaga, Fermin Landa eta Gorka Zafra igo dira lehen taldera, gazteen taldetik Gaizka Illarramendi atezaina eta futbola utzita zuen Andoni Acemel ere taldera itzuli da. Taldea utzi dutenen artean berriz, Jon Osinalde, lan kontuengatik, Asier Kortazar futbola utzi duelako eta Iosu Muiños eta Jon Iñaki Mendizabal daude, azken bi hauek Ondarroako Aurreran jokatuko baitute aurtengo denboraldian.
Denboraldi-aurrea
Zapatu goizean jokatu zuten mutrikuarrek denboraldi-aurreko azken partidua, Juan Jose Egia “Rubio” memoriala, Iurretako Kirol Taldearen aurka. Bizkaitarrak jokoan nagusi izan baziren ere, Aitor Esnalek penaltiz sartutako gola bati esker etxean geratu zen garaikurra, bat eta hutseko emaitzagaz. Denboraldi-aurreko beste neurketetan, Zestoaren aurka bi eta bi berdindu, Oriokori bi eta hiru irabazi, Zarautzen aurka bat eta huts galdu eta Aurreraren aurka bi eta huts galdu dute Txaparrok entrenatutako mutilek.
2017/2018 denboraldiko Mutriku Futbol Taldeko nagusien taldea. Argazkia: Mutriku F.T.
Ander Prieto kapitainak jaso zuen zapatuko garaikurra. Argazkia: Mutriku F.T.
