Euskal sortzaileak, Ondarroako IV. Marabilli Sormen Festibaleko protagonista
Urriaren 5etik 8ra ospatuko da Ondarroan IV. Marabilli Sormen Festibala. Urtero legez, Manuelistak dira antolatzaileak, eta aurreratu dutenez, aurtengo jaialdiak euskal sortzaileengan jarri du indarra. Hala, ondoko sortzaileek parte hartuko dute, besteak beste, aurtengo jaialdian: Jon Maya, Asier Altuna, Ander Lipus, Pako Aristi, Miren Amuriza, Thierry Biscary “Manez”, Zea Mays, Oskar Alegria, Iratxe Fresneda, Joseba Irazoki, Oier Ituarte eta Igor Zalakain.
“Oraintxe bertan hazten ari den belaunaldi bikain baten testigantza jaso nahi da. Zinegileak, idazleak, musikariak, aktoreak, argazkilariak, dantzariak, sukaldariak bilduko ditu gure egitarauak eta ziur gaude egitarautik kanpo ere asko etorriko direla Ondarroara, Marabilli horixe bihurtu baita, alor desberdinetako sortzaileak elkartzeko data ezinbesteko bat, agertokian bertan eta agertokitik kanpo”, diote Manuelistek.
Jose Mari Argoitia gogoan. IV. Marabilli Sormen Festibalak Jose Mari Argoitia hasieratik Marabilliko kide izan zenari omenaldia ere egingo dio. “Omenaldi berezia egingo diogu, eta horretarako Itoiz taldean bere lagun izan ziren Juan Carlos Perez eta Jose Garate Foisis gurean izango dira eta belaunaldi hartako erreferente nagusi den Bernardo Atxagak beren beregi idatzitako hitzaldia emango digu”. Aurreratu dutenez, unerik hunkigarriena izango da musika eskolako umeek Argoitiaren letrekin egindako Marea gora eta Lo egin kantatzen dituztenean, Dantzarteko ume dantzarien laguntzaz.
Saririk ere egongo da. Hala, urriaren 7an, I. Euskal Herriko Sormen Saria emango dute antolatzaileek. “Sormenaren alor zabalean nabarmendu den persona bati emango zaio sari hori”. Saria ez da dirua izango, “horretarako badaude beste sari batzuk”. Sarituaren itxurarekin egindako buruhandi bat izango da.
Amparanoia taldea, Zopilotes Txirriaus, Xurxo Souto idazle galiziarra (Ondarroa Galiza da) Euskal Herriko erraldoien bilkura, herriko taldeak, kaleko animazioa… “Lau egunetan ekitaldi guztietara joan nahi duenak nahiko gaitz edukiko du”.
III. Marabilli Sormen Festibalean egindako ‘Rosa rosi de mundu’ performancean parte hartu zuten artistak.
