Askotariko ekoizle eta artisauen produktuak eskuratzeko aukera egongo da Ispasterko Baserri Azokan
Zapatuan 10:00etan hasi eta 14:30ak aldera arte jarriko dituzte salgai baserritarren zein artisauen produktuak.
Ispasterko Udalak nekazal azoka antolatzeko Lea-Artibaiko Landa Garapenerako Alkartearen laguntza dauka, eta zehaztu dutenez, ekoizleen artean gehienak eskualdekoak izango dira: “Nagusiki Lea-Artibai eskualdeko nekazaritza-elikagaien produktuak izango dira salgai”.
Hain zuzen, hamalau bat erakusmahaietan askotariko produktuak egongo dira. Besteren artean, ortuariak, baserriko ogia eta gozoak, sagar zukua, sagardoa, barazki kontserbak, mermeladak, txakolina, ezti ekologikoa, gilden kontserbak, ahatekiak, idiazabal gazta eta paketetxoetan bildutako baserriko okela eskuratzeko aukera izango dute azokara hurreratzen direnek.
Era berean, bitxiak eta arropak egiten dituzten pare bat artisau ere egongo dira, eta Lekeitioko eskola publikoaren merchandising-a ere jarriko dute.
Gainera, hirugarren urtez jarraian abereak ere egongo dira azokan. Hala, herriko eta inguruko abeltzainek erakusgai jarriko dituzte behiak, idiak, poniak, hegaztiak, ahuntzak, zaldiak eta euskal artzain txakurrak.
Bestalde, ohitura legez parrilan erretako okela dastatzeko aukera eskainiko dute. Azokako bisitariek euro baten truke okela pintxoak jan ahalko dituzte, 12:00etatik 15:00etara. Horregaz batera, txakolina eta sagardoa ere egongo dira.
Ispastertarrek zein inguruko herritarrek azoka eguna “giro apartaz gozatzea” espero dute antolatzaileek, eta azokara hurbiltzeko gonbitea luzatu dute.
Besteak beste baserriko ogia eta idiazabal gazta erosteko aukera egongo da.
Aurten ere artisauak egongo dira.
