Iaz baino parte hartzaile gehiago egongo dira II. Ondarru-Lekitto kostaldeko lasterketan
Zapatuan egingo da kostaldeko bi herriak batuko dituen proba, 17:00etan, Ondarroako Itsasaurre plazatik Lekeitioko Independentzia plazaraino. Momentuz 160 lagun daude izena emanda, eta antolatzaileen ustetan “iaz baino parte hartzaile gehiago egongo dira, egun oso bat geratzen baita, eta iaz 162 izan baitziren parte hartzaileak”. Izena ematea bihar [irailak 22] gauean amaituko da. Egunean bertan ezin izango da izenik eman.
Antolatzaileek nabarmendu dutenez, errepidea erabat itxita egongo da lasterketa hasi baino ordu erdi lehenagotik, eta korrikalariek bi ordu edukiko dituzte ibilbideak dauzkan 16 kilometroak burutzeko. Azpimarratu dute, Ertzaintzak emandako irizpideei jarraituz, bidegurutze bakoitzean natolakuntzako kideren bat egongo dela, autoak lasterketa eremura sartu ez daitezen; gainera, lehen korrikalariaren aurretik ere antolakuntzako auto bat joango da. Ondarroako Itsasaurre plazatik egingo den irteera ez da neutralizatua izango.
Anoa puntuak 5. kilometroan eta 10. kilometroan egongo dira, eta gogorarazi dute puntu horietan soilik edatekoa egongo dela. Hornidura solidoa bakarrik Lekeitioko helmugan egongo da. Bestalde, antolakuntzak txosna bat ere jarriko du Independentzia plazan, jai giroa bermatzeko.
Autobusak. Lekeitiotik Ondarroara etorri nahi duten korrikalariek autobus zerbitzua edukiko dute 15:00etatik 16:00etara. Bestalde, dortsal banaketa Ondarroako Itsasaurre plazan egingo da 15:00etatik 16:45era bitarte. Ondarru-Lekitto kostaldeko lasterketan maila berean parte hartuko dute korrikalari guztiek, eta soilik emakumeen eta gizonen arteko bereizketa egingo da sariak ematerako orduan. Sari banaketa 19:00etan hasiko da Independentzia plazan.
Ekaitz Kortazar, Aitor Mimenza eta Ibon San Miguel, iazko lehen hiru gizonezkoak proba amaituta.
