Aireko Topagune Bertikala egingo dute lehenengoz Mendexan
Barikuan hasi (irailak 29) eta domekara arte (urriak 1) askotariko ikastaroak eskainiko dituzte udalerriko frontoian.
Parte hartzeko izena ematea beharrezkoa da, eta plaza mugatuak daude. Ikastaroetara joateko asmoa dutenek telefono zenbaki honetara deituta izena eman behar dute: 687 83 15 41. Halaber, helbide elektroniko honetara idatzita ere izena emateko aukera eman dute: laglozirkodantza@gmail.com. Barikua da izena emateko azken eguna.
Adin guztientzako ikastaroak dira; ume, gazte zein nagusiek parte hartu dezakete. Sasoian egotea, eta altuerei beldurrik ez izatea dira baldintza bakarrak.
La Glo Circo konpainiako bost irakaslek emango dituzte tailerrak. Konpainia desberdinetako kideek osatzen dute La Glo Circo. “Mendexako frontoiak aukera asko ematen dizkigu. Leku askotan eman ditugu tailerrak, baina eskualde honetan lehenengoz egingo dugu halako topaketa bat”. Azaldu dutenez, izena ematen dutenen adinaren arabera osatuko dituzte taldeak, eta bi aukera emango dituzte.
Trapezioak, uztaiak, oihalak, sokak eta antzeko elementuak erabiltzen irakatsiko dute ikastaroetan. Besteren artean, dantza bertikala, binakako aireko soka-teknikak, puntu finkoak eta elastikoak landuko dituzte.
Ordutegiak. Barikuan 16:00etan ondoetorria eman, eta 17:00etatik 19:00etara egingo dute lehenengo ikastaroa, eta jarraian, 21:00ak arte emango dute bigarrena. Besteren artean, muntaia, segurtasuna, oihalak, uztaiak eta dantza bertikalari buruzko tailerrak izango dira.
Zapatuan lau ikastaro egongo dira aukeran; 10:00etatik 14:00etara ariko dira, eta eguerdiko atsedenaldiaren ostean, 17:00etan ekingo diote lanari, 21:00ak arte. Hala, besteak beste, sektoreko arauei buruzko berbaldi-eztabaida egingo dute goizean.
Domekan, ostera, 10:00etan hasi, eta 20:00ak arte emango dituzte ikastaroak (14:00-16:00 atsedenaldia). Besteren artean, trapezioa, aireko dantza, hormako dantza bertikala eta soka finkoa zein elastikoari buruzko ikastaroak emango dituzte.
Kabareta. Tailerrak ez ezik, bariku eta zapatu gauerako herritar guztiei zuzendutako ekitaldiak prestatu dituzte. Hain zuzen, barikuan Saritah-ren kontzertua (22:30) egongo da, eta zapatuan KAbaRetea Aeireko deritzon kabareta eskainiko dute 22:30etik aurrera.
