Musikaz betetako astea dakar Musika Bandaren 150. urteurreneko ospakizunak
Lekeitioko Musika Bandaren 150. urteurreneko ospakizunen amaiera gisa Aste Musikala ospatuko da zapatutik [urriak 7] urriaren 14ra bitartean, Lekeition. Herriko musika taldeen emanaldiak eskaini eta bandaren historia laburbiltzen duen dokumentala ere estreinatuko dute egunotan.
Udalerriko akta batean azaltzen denez, 1867ko urriaren 14an onartu zuen udalbatzak bandaren hasiera, eta aste bete aurretik hasi eta egunean bertan amaitu nahi izan dituzte ekimenak. Urtzi Iriondo Lekeitioko Musika Bandako zuzendariak gogora ekarri duenez, urte osoko egitaraua prestatu zuten 150. urtemuga ospatzeko. «Lau ziklo antolatu ditugu, eta Aste Musikala izango da euretako azkena».
Aittitta Makurra Txarangaren kalejiragaz hasiko da zapatuan, Aste Musikala, eta 12 Hilabete, 12 Kontzertu zikloaren hileroko kontzertuaz gozatzeko aukera ere egongo da, beti bezala, 20:00etan, Andra Mariaren Zeruratzea basilikan. Domekan eta astelehenean, berriz, kalejiran ibiliko dira herrian zehar, Itxaropena Txistulari Taldea eta Musikaia Musika Eskolako musikariak.
Kioskoan. Datorren astean Musika Bandaren 150 urtetako historia ezagutzeko aukera ere egongo dela azpimarratu du Urtzi Iriondok. «Fernando Garatea artxibo guztiak miatzen ibili da, eta musika bandaren hastapenetatik gaur egunera arte aurkitu duen informazioa ezagutzera emango die herritarrei». Horrez gain, bisita gidatua ere antolatu du. Hala, eguaztenean, 17:00etan, Konpainiako eliza aurretik irtengo da Fernando Garateak gidatutako bisita, eta 18:00etan, hitzaldia emango du kultur etxean.
Lekitto Musika Bandaren kontzertua Nautika aurrean.
«Dokumentalak bi bidai paralelo kontatzen ditu, alde batetik, bandaren historia eta bestetik, orain dela urte bete bandak Holandara egindako bidaia»Musika bandaren dokumentala ere nabarmendu du bandako zuzendariak. Enekoitz Andonegi zuzendariaren, Amaia Uribe kazetariaren eta Urtzi Iriondo beraren artean sortu dute ikus-entzunezkoa. «Hiruron artean zuzendu dugu, Fernando Garatearen laguntzagaz». Dokumentala, urriaren 13an emango dute, 19:00etan Ikusgarri zineman. «Bi bidai paralelo kontatzen ditu, alde batetik, bandaren historia eta bestetik, orain dela urte bete bandak Holandara egindako bidaia». Herriko taldeez gain, Ondarroako metal taldearen eta Donostiako Big Band-aren kontzertuekin gozatzeko aukera ere izango dute musika zaleek. Lehenengoa urriaren 11n Azkue aretoan, eta bigarrena urriaren 12an Ikusgarri zineman. Bandaren urteurren egunerako, bestalde, Aratuste Alai Estudiantinaren kalejira eta Lekitto Musika Bandaren kontzertua utzi dituzte. Bandako zuzendariak azaldu duenez, hainbat urtetan egin modura, Kioskoan joko du herriko bandak, «jarraitzaileentzako opari modura».
