Galletebeitia, Ajuriagojeaskoa eta Enbeita, txapelketatik kanpo

Asier Alkorta

Amoroto,Aulesti,Berriatua,Etxebarria,Gizaburuaga,Ispaster,Lekeitio,Markina-Xemein,Mendexa,Munitibar,Mutriku,Ondarroa,Ziortza-Bolibar

2017/10/16

Bertsolari Txapelketa Nagusiko azken final laurdena jokatu zen zapatuan [urriak 14] Tolosako Beotibar pilotalekuan. Horretan Xabat Galletebeitia bertsolari lekeitiarra aritu zen. 636 puntugaz, lekeitiarra bosgarren geratu zen, eta finalaurrekoetan aritzeko txartelik ez zuen lortu. Lehenengo fasea amaituta, puntuazioz txapelketatik kanpo geratu dira baita ere Onintza Enbeita muxikarra (640,5 puntu) eta Ibon Ajuriagojeaskoa gernikarra (616 puntu). Nerea Ibarzabal da txapelketan jarraitzen duen bertoko ordezkari bakarra. Etxahun Lekuek irabazi zuen zapatuan azken final laurdeneko saioa; larrabetzuarrak 673 puntu eskuratu zituen. Azken saio horretan aritu ziren baita ere Maddalen Arzallus (670), Jon Maia (662,5), Beñat Lizaso (646,5) eta Eneko Lazkoz (607).

Etxahun Lekue, Tolosan. Atzean, eskuman, Xabat Galletebeitia. Argazkilaria: Alberto Elosegi/XDZ

Azken saioa, jendetsua. Bertsozale Elkarteak azaldu duenez, final laurdeneko azken saioak 1.250 ikusle bildu zituen. Ion Zaldua aritu zen gai jartzaile lanetan, eta epaimahaia ondokoek osatu zuten: Eneko Bidegain, Maite Sukia, Jurgi Fuentes, Karlos Ibarguren, Jon Abril, Aitor Jimenez eta Iñaki Aurrekoetxea. Bestalde, Nerea Goñi eta Joxe Mari Altuna idazkari lanetan aritu ziren. Final laurdeneko fasean sei kanporaketa saio jokatu dira. Eta horietan ondokoak izan dira irabazleak: Alaia Martin (Baigorri), Jon Martin (Segura), Oihana Iguaran (Leitza), Miren Amuriza (Zalla), Nerea Ibarzabal markina-xemeindarra (Zumaia) eta Etxahun Lekue (Tolosa). Finalerako sarrerak. Halaber, abenduaren 17an Barakaldoko BECen jokatuko den finalerako sarrera guztiak agortu egin direla esan du Bertsozale Elkarteak. «Irailaren 12an, Bertsolari Txapelketa Nagusia aurkezteaz batera, finaleko sarrerak salgai jarri ziren Bertsozale Elkarteko bazkideentzat. Urriaren 2tik aurrera bazkide ez zirenek ere horiek erosteko aukera eduki zuten. Eta azken sarrerak domekan saldu ziren». Hala, BECeko aforoa bete-beteta dagoela esan dute. FINALAURREKOAK

Final laurdenetatik sailkatutako bertsolariak (18): Oihana Iguaran (714), Alaia Martin (712), Miren Amuriza (700,5), Nerea Ibarzabal (698,5), Agin Laburu (686), Iñaki Apalategi (685), Julio Soto (678,5), Unai Agirre (674,5), Jon Martin (673,5), Etxahun Lekua (673), Maddalen Arzallus (670), Nerea Elustondo (665,5), Jon Maia (662,5), Jone Uria (662), Nahikari Gabilondo (661,5), Miren Artetxe (661,5), Beñat Iguaran (655,5) eta Aimar Karrika (651,5).
Duela lau urte finalista izandakoak (6): Aitor Mendiluze, Aitor Sarriegi, Beñat Gaztelumendi, Igor Elortza, Maialen Lujanbio eta Sustrai Colina.
Finalaurreko saioak: Bastida (urriak 28), Irun (azaroak 1), Maule-Lextarre (azaroak 4), Durango (azaroak 12), Amurrio (azaroak 19), Donibane Lohizune (azaroak 26) eta Iruñea (abenduak 2). Finala. Abenduak 27, Barakaldoko BECen.