Ibon Iparragirre preso gaixo larria aske uzteko eskatu dute Ondarroan
Atzo eguerdian [urriak 15] egin zuten elkarretaratze informatiboa Ondarroako Alamedan, eta jende asko hurbildu zen herriko presoaren osasun egoerari buruzko informazioa jasotzera.
Iparragirreren egoera hil ala bizikoa dela salatu zuten Iparra Galdu Baik plataformako kideek, eta berandu baino lehen aske uzteko eskatu zuten. Bere anaia Gotzon Iparragirrek nabarmendu zuenez, “hari baten menpe dago Ibonen bizia, eta hari hori hain da fina mediku forentseek ere ezin dutela zehaztu bizi esperantza”. Gaineratu zuen edozein infekzioren menpe dagoela bere anaiaren bizia.
Elkarretaratzeak. Egoera honen harira, Kalera-Kalera ekimenak hainbat elkarretaratze egingo ditu eguaztenean [urriak 18] 19:00etan Hego Euskal Herriko eskualdeetako epaitegien Iparragirreren askatasuna eskatzeko. Bizkaian, Bilbon, Getxon, Barakaldon, Gernikan eta Durangon batuko dira; Gipuzkoan berriz, Donostian, Tolosan, Azpeitian, Eibarren, Irunen eta Bergaran; Araban, Gasteizen, eta Nafarroan, Iruñean, Tuteran eta Tafallan.
Kalera-Kalera ekimenak zehaztu duenez, gaur egun Ibon Iparragirre aske uzteko erabakia Castro epailearen eta Alcala Meco espetxeko medikuaren esku dago. Biak dira beraien ustez “presoa jasaten ari den tratu anker eta gizagabearen erantzule, eta beraiek izango dira Iparragirre lehenbailehen askatu ezean iragarritako heriotzaren arduradunak”.
HONEKIN LOTUTA:
Atzo eguerdian Ondarroako Alamedan egindako elkarretaratzea. Argazkia: Iratz Urkiza
- [MAIATZAK 17] Medikuek ohartarazi zuten Iparragirrek espetxetik kanpo egon beharko lukeela
- [EKAINAK 1] Iparra Galdu Baik plataformak presoaren egoera kritikoa ez, are larriagoa zela esan zuten
- [EKAINA 2] Eusko Legebiltzarreko talde guztiak Iparragirre aske uztearen alde agertu ziren, PP salbu
- [EKAINAK 7]Ibon Iparragirre preso gaixo larria aske uzteko eskatu du Ondarroako Udalak
- [EKAINAK 11] Iparragirre aske uzteko eskatzeko Bilbon egindako manifestazioa
