Lekeitioko Bizilagunak programan parte hartzeko azken egunak
Datorren martitzenean [urriak 31] amaituko da Lekeitioko Udaleko Elkarbizitza Lan Taldeak bigarren urtez antolatu duen Bizilagunak programan parte hartzeko epea. Ekimenak, herrialde ezberdinetako familiak elkartuko ditu mahaiaren inguruan, azaroko domeketan, bietako baten etxean.
Bazkari bakoitzean, familiez gain dinamizatzaile batek parte hartuko du, antolaketan laguntzeko. “Bizilagunak ekimenak harreman berriak egiten lagundu dezake, lagunak egiten bertakoen eta Lekeition bizitoki berri bat topatu dutenen artean” diote antolatzaileek.
Jende askorentzat bazkari hauen antolaketa zubiak eraiki eta baikorki aktibatzeko modua dela nabarmendu dute. “Nahiz eta jende askok hurbiltzea buruan izan, askotan ez da aukerarik edota leku egokirik aurkitzen”. Hori dela eta, ekimenak oso elkargune berezia osatuko duela esan dute “atzerritarren eta bertakoen arteko ezagutza sustatzeko eta haien arteko bizikidetza baldintzatzen duten aurreiritziak gainditzeko”.
Ekimenean parte hartzeko izena eman behar da aldez aurretik. Horretarako agurtzane-ongintza@lekeitio.eus helbidera idatzi edo Lekeitioko Udaleko bulego orokorretara jo daiteke.
