'Tazan' filmak irabazi du XIII. Kameratoia
Lekeitioko Udalak Euskaltzaleen Topaguneagaz elkarlanean antolatutako XIII. Kameratoiko sariak banatu zituzten zapatuan [urriak 28] Lekeitioko Ikusgarri zineman. Hemezortzi taldek eman zuten izena parte hartzeko, baina horietatik hamahiruk aurkeztu zuten film laburra. Filmak egiteko 48 ordu izan zituzten parte hartzaileek.
Aurtengo Kameratoia rallyaren irabazlea Udafilms taldearen Tazan filma izan da. Talde horrek, gainera, hirugarren urtez jarraian irabazi du Kameratoiko sari nagusia. Epaimahaiaren iritziz Tazan lana izan zen egitura gehien errespetatu zuena. «Hasierako korapiloagaz eta amaieragaz, istorio bat kontatzen du».
Bigarren saria ondarrutar batek eta mutrikuar batek osatutako Txistana taldearen Abisal lanarentzat izan zen; «poetikaren bidez hausnarketarako bidea eskaintzeagatik» saritu zuen epaimahaiak. «Helduarazi nahi duen mezua osotasunez biltzen du lanak, bai testu bidez, bai eta bitarteko bisualen bidez ere». Aspektu teknikoari dagokionez, ur azpiko planoek istorioari ematen dioten «indarra eta zentzua» ere azpimarratu zituzten.
Hirugarren saria LPM taldearen Dzanga?? filmak jaso zuen. Publikoaren saria, ostera, Berta Productions taldearen Dzanga Jauna-k jaso zuen.
Oro har, lehiaketara aurkeztutako lanen kalitate ona azpimarratu nahi izan zuten bai epaimahaiak eta baita ere antolakuntzak.
Sariak. 1.200 euro, 800 euro eta 600 euroko diru sariak eskuratu zituzten lehen, bigarren eta hirugarren saridunek, hurrenez hurren.
XIII. Kameratoiko saridunak, aurkezleak eta udal ordezkariak. Argazkia: Euskal Zine Bilera/Facebook.
Txistana taldeko kideak (Ondarroa-Mutriku), Lekeitioko Udal ordezkariagaz. Argazkia: Euskal Zine Bilera/Facebook.
Uda Films taldeko kideak. Argazkia: Euskal Zine Bilera/Facebook.
