Zapatuan jokatuko dute Lea-Artibai eta Mutrikuko nagusien futbol talde guztiek
Berriatuko Futbol Taldeak eta Mutriku Futbol Taldeko neskak eta mutilek 16:00etan jokatuko dituzte euren partiduak. Berriatukok Ezkurdi talde durangarra hartuko du Ibarran eta etxeko azken partiduan egin bezala garaipena lortzen saiatuko dira Erketz Azkueren mutilak. Mutrikuko mutilek irteera zaila dute asteburuan. Hernaniren aurka jokatuko dute puntuak ateratzea oso zaila izan ohi den Zubipen. Azkenik, neskek Bergara hartuko dute San Migelen. Mutrikuarrek baino puntu bat gehiago dute debagoiendarrek eta azken partiduan Deban lortutako garaipen ederrari jarraipena ematen saiatuko dira.
Ordu erdi beranduago jokatuko du Lekeitio Futbol Taldeak, Larrotegin. Trapagaran izango dute bisitari lekeitiarrek, sailkapenean puntu bat gutxiago duen taldea. Garaipenak goiko postuei begira jartzeko aukera bikaina emango die lekeitiarrei.
Artibaik ere puntuak batzen jarraitu nahi du. Pasa den asteko lehen garaipenari orain etxean jarraipena ematea da Bitor Lekunberriren mutilen asmoa. 17:00etan hasiko da Barroetan Ugaoren aurkako partidua.
Jokatzen azkena Aurrera Kirol Elkartea izango da. Irteera zaila dute ondarrutarrek Erandiora Apurtuarte taldearen aurka jokatzeko. Azken partiduko jipoia ahaztu eta berriz garaipenaren bidera itzuli nahi dute. Bi taldeek elkarren aurka jokatu zuten azken partidua 2010eko ekainaren 12an izan zen, Zaldupen, 3.mailara igotzeko play-offetako partidua.
Berriatuko Futbol Taldea. Argazkia: Leartigol
Aurrerako jokalariak gola ospatzen. Argazkia: Aurrera K.E.
