Eskorbutok zabalduko du gaur Markina-Xemeingo Uhagon kulturguneko asteburuko eskaintza
Eskorbuto Santurtziko punk talde mitikoari buruzko dokumentala dakar gaurko [azaroak 10] pintxo zinemak 20:30etik aurrera: Kikol Grauk zuzendutako Eskorbuto, la mas macabra de las vidas. Erritmo bizian grabatuta, 80ko hamarkada, elkarrizketak, egoera politikoa, musika eta Nerbioi ibaiaren ezkerraldeko hondamenaren collage bat biltzen du gazteleraz grabatutako dokumentalak.
Orain arteko pintxo zinemetan jendeak ondo erantzun duela diote Uhagoneko arduradunek. «Dokumental musikatuak dinamikoagak izaten dira, eta jendeak gustukoak ditu».
Punketik flamenkorako jauzia eginda, La Pulga eta Lagunak izeneko kuadro flamenkoa ailegatuko da bihar arratsaldea [azaroak 11] girotzera. Flamendo tradizionalaren erroetatik abiatuta, magia eta zentzumenen giroa ekarriko ditu Uhagoneko agertokira Ufadak azken lanak. Indarra, sentitzeko grina, poza, teknika zaindua…, hori eta askoz gehiago ekarriko ditu oholtzara.
Ufadak 80 minutu inguruko ikuskizuna da, eta horietan dantza, kantua, gitarra, perkusioa eta palmak biltzen dituzten kantuen bitartez, flamenkoaren hainbat alderdi eskaintzen ditu: seguidilla, alegria, solea, tangoa, buleria… Askoa Etxebarrieta Lasheras La Pulga dantzaria, Angel Lopez de Toro kantaorea, Aitor Escobar gitarra-jotzailea eta zehazteke dagoen perkusio jotzaile bat egongo dira agertokian.
Sormena lantzen. 7 urtetik gorako umeei zuzendutako Light Painting tailerra hartuko du Uhagoneko erakusketa gelak domekan [azaroak 12]. 16:30ean hasi eta 18:00etara arte luzatuko da. Azken hiruhilabeteko artista gonbidatu Rafa Rodrigok emango du tailerra, eta ez da aurretiaz izenik eman beharko. Argiagaz marraztearen teknika geroz eta gehiago ikusten dugu ikus-entzunezkoetan. Ez argazkigintzan bakarrik, baita bideogintzan ere. Teknika erraz eta dibertigarria da. Sormen Lantegikoek gonbidapena luzatu dute: «Azaroaren 12an itxaroten zaituztegu».
Eta asteburua borobiltzeko, Markina-Xemeingo Udal Parekidetasun Batzordearen ekimenez, Bertha Gaztelumendik zuzendutako Volar filma emango dute. Genero indarkeria jasan duten bederatzi emakumeren testigantzak jaso ditu zuzendariak, eta horietako bi egongo dira lana aurkezten Uhagonen. Emakundek aurkeztu zuen Donostiako Zinemaldian.
La Pulga eta Lagunak. Argazkia: La Pulga
Eskorbuto. Argazkia: dirtyrock.info
